तळेगाव परिसरात बिबट्याची दहशत

तळेगाव ढमढेरे, ता. ३० : तळेगाव ढमढेरे (ता. शिरूर) गणेश मळा येथे मंगळवारी (ता. ३०) दिवसा बिबट्याचे दर्शन झाल्याने परिसरात खळबळ उडाली. येथील श्वेता ढमढेरे व सुनीता ढमढेरे या शेतकरी महिलांना दिवसा बिबट्याचे दर्शन झाले. यावेळी त्यांनी आरडाओरडा केल्याने बिबट्याने उसात पळ काढला. महिलांच्या आवाजाने तेथील स्थानिक ॲड. संपत ढमढेरे, दिलीप ढमढेरे, अनिल ढमढेरे, गणेश ढमढेरे, राहुल ढमढेरे,आकाश ढमढेरे, संजय ढमढेरे या वेळी एकत्र येऊन बिबट्यापासून संरक्षण होण्यासाठी वनविभागाकडे पिंजऱ्याची मागणी केली.
यावेळी ॲड. संपत ढमढेरे म्हणाले, ‘‘तळेगाव ढमढेरे परिसरातील गणेश मळा, केवटेमळा, कोल्हेमळा व ढमढेरे वस्ती या ठिकाणी अनेकवेळा बिबट्याचे दर्शन झाले असून, पाळीव प्राण्यांवर बिबट्याने हल्ला केला आहे. परिसरात बिबट्यांची संख्या वाढली असून, वास्तव्य वाढले आहे. त्यामुळे दररोज नागरिकांना बिबट्याचे दर्शन होत आहे. शेतकरी, शेतमजूर, महिला, शालेय मुले बिबट्याच्या दहशतीने घाबरत आहेत. वनविभागाने परिसराची पाहणी करून त्वरित पिंजरा लावावा.’’