महामार्गाच्या रुंदीकरणात बाजार मैदानाचा बळी

तळेगाव ढमढेरे, ता.१८ : येथील बाजार मैदानातून शिक्रापूर-न्हावरा हा नियोजित महामार्ग जातो. सध्या या महामार्गाचे वेगात रुंदीकरण सुरू आहे. या महामार्गामुळे मैदानातील हक्काची जागा रस्त्यामध्ये जात असल्याने गावचे नुकसान होणार आहे.
या महामार्गामुळे तळेगाव ढमढेरे (ता. शिरूर) येथील आठवडा बाजार बंद होणार आहे. ग्रामदैवत हनुमान देवाची यात्रा तसेच लोकशाहीर अण्णा भाऊ साठे, भारतरत्न डॉ. बाबासाहेब आंबेडकर, छत्रपती शिवाजी महाराज आणि महात्मा जोतिराव फुले यांची जयंती व पुण्यतिथी येथील बाजार मैदानातील प्रांगणात साजरी केली जाते. या मैदानातून हा महामार्ग जात असल्याने ग्रामस्थांचे मोठे नुकसान होणार आहे. तसेच याच मैदानावर ‘पीएमपीएमएल’चा बसथांबाही आहे. येथील बाजार मैदानातून हा महामार्ग न नेता या महामार्गासाठी पर्यायी रस्ता शोधावा व तेथून महामार्ग पुढे न्यावा, अशी मागणी शिवसेना उद्धव बाळासाहेब ठाकरे पक्षातर्फे करण्यात आली आहे. शिवसेनेतर्फे ‘बाजार मैदान वाचवा अभियान’ सुरू करण्यात आले आहे. बाजार तळातील महामार्गाला शिवसेना उद्धव बाळासाहेब ठाकरे पक्षातर्फे तीव्र विरोध करण्यात आला असून, यासंदर्भात आमदार माउली कटके यांना नुकतेच शिवसेना पदाधिकाऱ्यांनी निवेदन दिले आहे. येथील बाजारतळातील महामार्गाच्या संदर्भात जिल्हाधिकाऱ्यांशी चर्चा करून त्वरित निर्णय घेणार असल्याचे आश्वासन आमदार कटके यांनी शिवसेना उद्धव बाळासाहेब ठाकरे पक्षाच्या पदाधिकाऱ्यांना दिले आहे.