श्रीकांत सातपुते यांना ‘समाजभूषण पुरस्कार’

तळेगाव ढमढेरे, ता. १८ : तळेगाव ढमढेरे (ता. शिरूर) येथील सामाजिक कार्यकर्ते श्रीकांत सातपुते यांना समस्त हराळे वैष्णव समाज धर्मशाळा संस्थेतर्फे आळंदी येथे सन २०२५ चा समाजभूषण पुरस्कार देऊन मान्यवरांच्या हस्ते सन्मानित करण्यात आले आहे. स्मृतिचिन्ह, सन्मानपत्र, शाल, श्रीफळ, पुष्पगुच्छ व पुस्तक भेट देऊन सातपुते यांचा सपत्नीक सत्कार केला.
या वेळी महाराष्ट्र राज्य मागासवर्गीय विकास महामंडळाचे माजी अध्यक्ष ज्ञानेश्वर कांबळे, समस्त हराळे वैष्णव समाज संस्थेचे अध्यक्ष बाबासाहेब कांबळे, कार्याध्यक्ष अनिल सातपुते, बाळासाहेब चव्हाण आदी उपस्थित होते.
दरम्यान, उल्लेखनीय सामाजिक कार्याबद्दल श्रीकांत सातपुते यांना २०१९ मध्ये महाराष्ट्र शासनाचा समाजभूषण पुरस्कार मिळाला आहे. सातपुते यांनी चर्मकार समाजासाठी अविरत कार्य केले आहे, तसेच त्यांनी शिरूर तालुका व पुणे जिल्ह्यातील विविध संस्थांवर तसेच शासकीय समित्यांवर काम केले आहे. संजय गांधी निराधार अनुदान योजनेचे तालुका अध्यक्ष म्हणून, तसेच शिरूर तालुका खादी व ग्रामोद्योग संघाचे अध्यक्ष म्हणूनही त्यांनी काम केले आहे. फुले, शाहू, आंबेडकर व संत रोहिदास महाराज यांच्या विचारांचा सातपुते यांच्यावर पगडा आहे.