इस्राईलच्या कृषी तज्ज्ञांनी जाणून घेतल्या यशोगाथा

टाकळी हाजी, ता १२ : निमगाव दुडे (ता. शिरूर) येथील डाळिंब बागेला इस्रायलमधील कृषी तज्ज्ञांनी भेट दिली व बागेची पाहणी करीत येथील शेतकरी नवनाथ हजारे यांच्याशी हितगूज साधले. डाळिंब उत्पादन तंत्रज्ञानाची सखोल माहिती घेत उपस्थित शेतकऱ्यांच्या यशोगाथा जाणून घेत कौतुक केले.

बेट भागात मुरबाड जमिनीत डाळिंबाचे मोठ्या प्रमाणात उत्पादन घेतले जाते. कांद्याचे आगार समजला जाणारा हा भाग डाळिंब उत्पादनातही अग्रेसर आहे. येथील तरुणांनी आधुनिक तंत्रज्ञानाचा वापर करून मेहनतीच्या बळावर यशाचा टप्पा गाठला आहे. डाळिंबांच्या उत्पादनामुळे शेतकऱ्यांच्या पत्र्यांच्या घराच्या जागेवर बंगला उभा राहिला असून, त्यासमोर चारचाकी मोटार दिसत आहे. या भागातून दरवर्षी हजारो टन डाळिंब निर्यात केले जाते. त्यामुळे या भागातील डाळिंब बाग पाहण्यासाठी इस्राईल येथील तज्ज्ञ एली ॲमॉन, इलाना फहीमा, ड्रेफस यांनीही येथील शेतकऱ्यांची यशोगाथा ऐकून घेतल्या. यावेळी अनंत कुलकर्णी, विनोद कुमार, संजय बिराजदार, अंबुज जैन, तपस्वी शरण, राहुल कोळगे यांनी डाळिंब बागेची पाहणी केली.

इस्राईलच्या तंत्राचा वापर करण्यास वाव
डाळिंब मार्गदर्शक दत्ता कांदळकर व किरण कांदळकर यांनी इस्राईलच्या तज्ज्ञांना उत्पादनाबाबत माहिती दिली. तज्ज्ञांनी शेतकऱ्यांचे कौतुक करीत भारतीय शेतकऱ्यांनी इस्राईलप्रमाणे प्रगत तंत्राचा वापर करून शेती उत्पादन करण्यास मोठा वाव असल्याचे प्रतिपादन केले.

औक्षण करून पाहुण्यांचे स्वागत
यावेळी डाळिंब उत्पादक शेतकरी नवनाथ हजारे, डॉ. अरुण थोरात, संतोष घोडे, किशोर बारहाते, विलास घोडे, साळभाऊ पानगे, बाळू साळवे, महेश बढे, सोमनाथ वागदरे, शंकर येडे या डाळिंब उत्पादक शेतकऱ्यांचा सत्कार करण्यात आला. शेतकरी नवनाथ हजारे यांनी फेटा बांधून महिलांनी औक्षण करीत स्वागत केल्याने पाहुणे स्वागत केले.

00624