टाकळी हाजी येथे शेताच्या वादातून हल्ला

टाकळी हाजी, ता ९ः येथील साबळेवाडी मध्ये जमीन मोजणीच्या वादातून झालेल्या हल्ल्यात वडील-मुलासह दोघेजण गंभीर जखमी झाले आहे. या प्रकरणी एकावर शिरूर पोलिस ठाण्यात शनिवारी (ता. ८)गुन्हा दाखल करण्यात आला आहे.
अनिल पोपट भाईक (रा. साबळेवाडी, टाकळी हाजी, ता. शिरूर) असे गुन्हा दाखल करण्यात आलेल्याचे नाव आहे. तर हरिदास अनंता भाईक (वय ५६, रा. साबळेवाडी, टाकळी हाजी, ता. शिरूर) यांनी फिर्याद दिली आहे. पोलिसांनी दिलेली माहिती अशी की, फिर्यादी भाईक हे त्यांच्या घरासमोर बसले असताना आरोपी अनिल भाईक तेथे आला. त्यावेळी फिर्यादी यांनी त्यांच्या गट क्रमांक २६९ मधील सर्व्हे नंबरची खूण दाखवून, “तू हरी भाईक यांच्याकडून जमीन विकत घेतली आहेस, त्यांच्याकडून मोजणी करून घे,” असे समजावून सांगत असतानाच आरोपी संतापला.या संतापातून आरोपीने हातातील लोखंडी गजाने हरिदास भाईक यांच्या डोक्यावर हल्ला करण्याचा प्रयत्न केला. गज डोक्यावरून सरकल्याने फिर्यादीच्या डाव्या खांद्यावर जोराचा वार बसला व खांद्याचे हाड फ्रॅक्चर होऊन गंभीर दुखापत झाली.
जखमीला उपचारासाठी कारमध्ये बसवून घेऊन जात असतानाही आरोपी रस्त्यात अडवा उभा राहिला आणि जखमींना रुग्णालयात जाऊ न देण्यासाठी अडथळा आणला. त्यावेळी त्याने शिवीगाळ करत जीवे मारण्याची धमकी दिली. तसेच आरोपीने हरिदास भाईक यांचे वडील अनंता हरी भाईक यांच्यावरही वीट फेकून मारली व शिवीगाळ व धमक्या दिल्याचे फिर्यादीत म्हटले आहे. या हल्ल्यामुळे फिर्यादीच्या कुटुंबास जीवितास धोका निर्माण झाला असल्याची नोंद करण्यात आली आहे. पुढील तपास पोलिस हवालदार अरुण उबाळे हे करीत आहेत.