सोनसाखळी चोर गजाआड

टाकळी हाजी, ता. १० : टाकळी हाजी (ता. शिरूर) येथील महिलेच्या गळ्यातील सोन्याची साखळी ओढून पसार झालेल्या चोराला शिरूर पोलिसांनी अवघ्या काही दिवसांत गजाआड केले आहे. पोलिसांच्या तत्परतेमुळे परिसरातील महिलांमध्ये दिलासा निर्माण झाला आहे.
पोलिसांनी दिलेल्या माहितीनुसार, मंगळवारी (ता. ४) टाकळी हाजी येथील सुशीला पांडुरंग घोडे या निघोज (ता. पारनेर) येथील मंगळवारच्या आठवडे बाजारातील काम आटपून सायंकाळी साडेसातच्या सुमारास स्कूटीने आपल्या घरी परतत होत्या. मळगंगा देवी कुंड परिसरातून टाकळी हाजीच्या दिशेने जात असताना दुचाकीवर आलेल्या एका तरुणाने संधी साधत त्यांच्या गळ्यातील सोन्याची साखळी हिसकावून पळ काढला.
या प्रकरणी घोडे यांनी दिलेल्या फिर्यादीनंतर सहाय्यक पोलिस निरीक्षक दिलीप पवार यांनी तातडीने तपास सुरू केला. घटनास्थळाजवळील सीसीटीव्ही फूटेज तपासल्यावर पोलिसांना संशयिताचा माग काढण्यात यश आले. पोलिसांनी सुनील रामदास कांदळकर (रा. पाबळ, ता. आळकुटी) याला अटक केली असून चौकशीत त्याने गुन्ह्याची कबुली दिल्याचे पोलिसांनी सांगितले.
त्याने चोरलेले सोने सोनाराकडे विकल्याचे उघड झाले असून सोन्याची किंमत सुमारे एक लाख साठ हजार रुपये होती. न्यायालयाने आरोपीला दोन दिवसांची पोलिस कोठडी दिली आहे.
या कारवाईत सहाय्यक पोलिस निरीक्षक दिलीप पवार, पोलिस हवालदार सागर बोराडे, एन. बी. दांगडे यांनी शिरूर पोलिस ठाण्याचे संदेश केंजळे यांच्या मार्गदर्शनाखाली तपास करून ही यशस्वी कामगिरी केली.