निमगाव दुडे येथे एक मादी जेरबंद

टाकळी हाजी, ता. १९ : शिरूर तालुक्यातील निमगाव दुडे येथील खंडोबा मंदिर परिसरात फिरत असलेल्या बिबट्या मादीस वनविभागाच्या पथकाने अखेर जेरबंद केले. शिरूरचे वनपरिक्षेत्र अधिकारी निळकंठ गव्हाणे यांनी ही माहिती दिली.
गेल्या आठ दिवसांपासून उसाच्या शेतात बिबट्याची बछडे दिसत असल्याने ग्रामस्थांमध्ये भीतीचे वातावरण निर्माण झाले होते. याच परिसरापासून एक किलोमीटर अंतरावर एका महिलेला हल्ल्याचा प्रयत्न झाल्याने नागरिकांमध्ये तणाव वाढला होता. परिस्थिती लक्षात घेऊन वनविभागाने खंडोबा मंदिर परिसरात पिंजरा लावला होता. बुधवार (ता. १९) सकाळी या पिंजऱ्यात बिबट्या मादी अडकलेली आढळून आली. पकडलेली मादी अंदाजे पाच वर्षांची असल्याचे वनपाल नारायण राठोड यांनी सांगितले. जेरबंद केल्यानंतर वनविभागाच्या पथकाने तिची प्राथमिक वैद्यकीय तपासणी करून तिला माणिकडोह बिबट केंद्रात सुरक्षितरीत्या सोडण्यात आले. दरम्यान, परिसरात दिसणाऱ्या बछड्यांवरही वनविभाग लक्ष ठेवून असून, त्यांचीही योग्य काळजी घेतली जात आहे. बिबट्या पकडल्याने नागरिकांनी वनविभागाचे समाधान व्यक्त केले असून, या भागात वनविभागाने गस्त वाढवावी, अशी मागणी ग्रामस्थांकडून होत आहे. या परिसरात मोठ्या प्रमाणात त्याचा वावर असून नागरिकांमध्ये भीती पसरली आहे.