मोदक वजन करून दिल्याने मारहाण

थेऊर, ता. १८ : मोदक घेताना झालेल्या वादात ‘मोदक वजन करून का दिले?’ असे म्हणत एका टोळक्याने शुक्रवारी (ता. १२) रात्री आठ वाजण्याच्या सुमारास थेऊर (ता. हवेली) येथील रेस्टॉरंटच्या मालकाला खुर्चीच्या लोखंडी पायाने मारहाण केली.
याप्रकरणी अर्जन रामेश्वर पाल (वय २७, रा. चिंतामणी गणपती मंदिराजवळ, थेऊर, मूळ गाव पाहाडपूर, ता. जि. कानपूर, उत्तर प्रदेश) यांनी लोणी काळभोर पोलिस ठाण्यात फिर्याद दिली. त्यानुसार साहिल (वय अंदाजे १९, रा. थेऊर) व त्याचे इतर ७ ते ८ अनोळखी साथीदारांवर गुन्हा दाखल केला आहे. पाल यांनी थेऊर येथे चिंतामणी रेस्टॉरंट हे भाडेतत्वावर चालविण्यासाठी घेतले आहे. येथे गणपतीसाठी लागणारे मोदक व पेढा बनवून त्याची विक्री केली जाते. ते हॉटेलमध्ये खुर्चीवर मोबाईल बघत बसले होते. तेव्हा त्यांच्या शेजारच्या राधिका हॉटेलमधील साहिल व त्याचे इतर ७ ते ८ अनोळखी साथीदार हे बेकायदेशीर जमाव जमवून आले. दुपारी मोदक वजन करून का दिले? असे म्हणत सकाळी झालेल्या भांडणाचा राग मनात धरुन हॉटेलमधील खुर्चीची तोडफोड केली. त्यातील एका खुर्चीचा तुटलेला लोखंडी पाय हातात घेऊन साहिल याने पाल यांच्या डोक्यात मारुन जखमी केले. त्यानंतर साहिल याच्या इतर साथीदारांनी हॉटेलमधील स्टीलच्या जगाने, हाताने व लाथाबुक्याने मारहाण केली. तसेच जाता जाता, ‘तुला बघून घेतो,’ अशी धमकी दिली. त्याच्यावर गुन्हा दाखल केला आहे. पुढील तपास लोणी काळभोर पोलिस ठाण्याचे वरिष्ठ पोलिस निरीक्षक राजेंद्र पन्हाळे यांच्या मार्गदर्शनाखाली पोलिस उपनिरीक्षक रत्नदीप बिराजदार करीत आहेत.