थेऊरमध्ये मजुराला बांबूने मारहाण

थेऊर, ता. १८ : ‘तू येथे काम करायचे नाही’ असे म्हणून प्लॉटिंगमध्ये काम करणाऱ्या एका मजुराला दोघांनी बांबूने मारहाण केल्याची घटना थेऊर (ता. हवेली) येथील काळे वस्ती परिसरात शनिवारी (ता. १३) दुपारी तीन वाजण्याच्या सुमारास घडली. या मारहाणीत मजूर गंभीर जखमी झाला आहे. या प्रकरणी लोणी काळभोर पोलिस ठाण्यात दोघांवर गुन्हा दाखल केला आहे.
सागर शंकर इंगळे (वय ४०, रा. काळे वस्ती, थेऊर), असे जखमी झालेल्या मजुराचे नाव आहे. तर, समीर पाचोरकर व मनिषा पाचोरकर (रा. थेऊर) अशी गुन्हा दाखल केलेल्यांची नावे आहेत.
पोलिसांनी दिलेल्या माहितीनुसार, फिर्यादी सागर इंगळे हे प्लॉटिंगमध्ये मजुरीचे काम करत होते.त्यावेळी आरोपी हे तेथे आले. दोघांनीही इंगळे यांना शिवीगाळ केली आणि, ‘तू येथे काम करायचे नाही,’ असे म्हणत हाताने मारहाण करण्यास सुरुवात केली. मारहाणीतून वाचण्यासाठी इंगळे हे सदर ठिकाणावरून पळून चालले होते. तेव्हा मनीषा यांनी फिर्यादीला पाठीमागून जोरात पकडले. त्यानंतर समीर यांनी तेथेच बाजूलाच पडलेल्या बांबूने फिर्यादीच्या डाव्या हातावर व डाव्या पायावर जोरजोराने मारहाण केली. या मारहाणीत इंगळे यांच्या डाव्या हाताला व डाव्या गुडघ्याला गंभीर दुखापत होऊन ते जखमी झाले होते. पुढील तपास लोणी काळभोर पोलिस ठाण्याचे वरिष्ठ पोलिस निरीक्षक राजेंद्र पन्हाळे यांच्या मार्गदर्शनाखाली पोलिस उपनिरीक्षक रूपाली जाधव करीत आहेत.