महा- ई सेवा, आधार केंद्र चालकांकडून संपाचा इशारा

उरुळी कांचन, ता. १० : महा ई सेवा व आधार केंद्र संघटना, महाराष्ट्र राज्य यांनी आपल्या विविध मागण्यासाठी शासनाला संपाचा इशारा दिला आहे. या पार्श्वभूमीवर संघटनेच्या पदाधिकाऱ्यांनी हवेली येथे तहसीलदार तृप्ती कोलते यांना शुक्रवारी (ता. ७) १२ ते १४ नोव्हेंबरपर्यंत महा- ई सेवा केंद्र बंदचे ठेवणार असल्याचे निवेदन दिले आहे.
यावेळी निवेदनात नवीन सेतू धोरणाबाबत आपले सरकार हेतू संदर्भातील शासन निर्णय (जी.आर) १० ऑक्टोबर २०२५ रद्द करून त्याची पुनर्तपासणी करावी. तसेच, १९ जानेवारी २०१८च्या जी.आर नुसार केंद्रांची संख्या मर्यादित ठेवावी. ग्रामपंचायत ऑपरेटर व अंगणवाडीप्रमाणे दरमहा २५००० रुपये मानधन देण्यात यावे. आधार कमिशन व विविध योजनांचे थकलेले कमिशन त्वरित देण्यात यावे‌. केंद्र संचालन व हस्तांतरण ग्रामपंचायत, शाळा व महाविद्यालयांना केंद्र आयडी देऊ नये. सेतू संचालकांना अधिकृत ओळख पत्र व प्रमाणपत्र देण्यात यावे. आधार व तांत्रिक सुधारणा आधार ऑपरेटरांना ब्लॅकलिस्ट न करता त्याचा तक्रारींची चौकशी करावी, आधार केंद्रांची जागा महा ई सेवा केंद्रात ठेवावी. लॉगिन प्रक्रियेत बायोमेट्रिक प्रणाली लागू करावी, यांसह विविध मागण्या केल्या आहेत.
यावेळी अध्यक्ष राज गायकवाड, उपाध्यक्ष अक्षय पिसाळ, कार्याध्यक्ष संतोष गायकवाड, सचिव गणेश बाळासाहेब ठोंबरे, समीर सावंत उपस्थित होते. या संपाला पुणे जिल्हा स्तरीय महा- ई सेवा व आधार केंद्र संघटना कार्यकारिणी मंडळाने एकमताने पाठिंबा दिला.