पुरातत्त्व विभागातर्फे थेऊरसाठी पाच कोटींचा निधी

थेऊर, ता. २१ : मंदिर जतन आणि संवर्धनाअंतर्गत पुरातत्त्व विभागाकडून थेऊरला पाच कोटी रुपये मंजूर झाल्याची माहिती पुरातत्त्व विभागाचे संचालक डॉ. विलास वहाणे यांनी दिली. या कामांचा प्रारंभ मान्यवरांच्या हस्ते नारळ वाढवून करण्यात आला. त्याप्रसंगी ते बोलत होते.
या निधीच्या माध्यमातून थेऊर मंदिर परिसरात विविध विकासकामे होणार आहेत. त्या अनुषंगाने चिंतामणी मंदिरात गुरुवारी बैठक झाली. यावेळी ग्रामस्थांना करण्यात येणाऱ्या कामाचे स्वरूप सांगण्यात आले. प्राप्त झालेल्या निधीतून प्रामुख्याने दगडी फरशी, लाकडी सभामंडप नूतनीकरण, दीपमाळ, दर्शन व्यवस्था, विद्युतीकरण, इतर सुविधा, दुरुस्त्या अशा कामांचा समावेश असणार आहे.
याप्रसंगी आर्किटेक्ट अंजली कलमदानी, थेऊरचे उपसरपंच भाऊसाहेब काळे, सदस्य संतोष काकडे, आबा काळे, पुजारी राहुल आगलावे, महेश आगलावे, विश्‍वस्त केशव विद्वांस, देवराज डहाळे, जितेंद्र देव उपस्थित होते.