केवायसी करुनही लाडक्या बहिणी लाभापासून दूर

उरुळी कांचन, ता. १९ ः राज्य शासनाकडून राबविल्या जाणाऱ्या मुख्यमंत्री माझी लाडकी बहीण योजनेअंतर्गत पात्र महिलांना दरमहा १५०० रुपयांप्रमाणे दिल्या जाणाऱ्या हप्त्याबाबत मोठा संभ्रम निर्माण झाला आहे. ई-केवायसी करूनही अनेक महिलांच्या बँक खात्यात अद्याप अनुदानाची रक्कम जमा झालेली नाही. त्यामुळे सर्वत्र नाराजी आणि चिंतेचे वातावरण पसरले आहे.
मुख्यमंत्री माझी लाडकी बहीण योजनेचा लाभ घेण्यासाठी शासनाने ई-केवायसी प्रक्रिया बंधनकारक करून त्याकरिता ३१ डिसेंबर २०२५पर्यंतची मुदत दिली होती. या कालावधीत राज्यभरातील लाखो महिलांनी ई-केवायसीची प्रक्रिया पूर्ण देखील केली. मात्र, त्यानंतरही अनेक पात्र महिलांच्या खात्यात १५०० रुपयांचा नियमित हप्ता जमा न झाल्याच्या तक्रारी महिलांकडून केल्या जात आहेत. काही महिलांना नियमितपणे अनुदान मिळत असताना, मात्र अद्याप नियमित हप्त्यासाठी काही महिलांना प्रतीक्षा करावी लागत आहे. विशेषतः ग्रामीण भागातील महिलांना याचा मोठा फटका बसत आहे. ई-केवायसी करताना विचारण्यात येणाऱ्या प्रश्नांची योग्य माहिती नसणे, तांत्रिक अडचणी, आधार कार्ड व बँक खात्याचे लिंकिंग अपूर्ण असणे तसेच अर्जात चुकून चुकीची माहिती भरली जाणे, या काही कारणांमुळे अनेक महिलांचे अनुदान रखडले का काय अशी शंका महिला व्यक्त करीत आहेत.
हप्ता वेळेवर जमा न झाल्याचे लक्षात येताच महिलांनी महिला व बालकल्याण विभाग, तहसील कार्यालये तसेच संबंधित शासकीय कार्यालयांकडे व डिजिटल सेवा केंद्राकडे धाव घेण्यास सुरुवात केली आहे. मात्र, अनेक ठिकाणी स्पष्ट व समाधानकारक उत्तरे मिळत नसल्याने महिलांच्या जिवाची घालमेल वाढली आहे. सर्व अटी पूर्ण करूनही जर अनुदान मिळत नसेल, तर आम्ही न्यायासाठी कुणाकडे दाद मागायची? असा सवाल महिलांकडून उपस्थित केला जात आहे.
या पार्श्वभूमीवर, शासनाने तातडीने स्पष्ट मार्गदर्शन करावे. तांत्रिक अडचणी दूर करण्यासाठी गावपातळीवर विशेष शिबिरे आयोजित करावीत. तसेच कोणतीही पात्र महिला अनुदानापासून वंचित राहू नये याची काळजी घ्यावी, अशी मागणी लाभार्थी महिलांकडून करण्यात येत आहे.