कारखेल येथे विजेच्या धक्क्याने तरुणाचा मृत्यू

उंडवडी, ता. १४ : कारखेल (ता. बारामती) येथे शनिवारी (ता. १३) सायंकाळी सव्वा पाचच्या सुमारास शेळ्या चारत असताना विजेच्या धक्क्याने अल्केश जगनाथ लोंढे (वय ४०) यांचा मृत्यू झाला.
मिळालेल्या माहितीनुसार, कारखेल हद्दीतील लोंढेवस्ती शेजारील गट क्रमांक २०४ मधील शेतात लोंढे शेळ्या चारत होते. रिमझिम पावसात विजेच्या खांबाजवळील विजेच्या तारांना स्पर्श झाल्याने त्यांना जोरदार धक्का बसला आणि ते जागीच कोसळले. ग्रामस्थांनी घटनास्थळी धाव घेऊन लाकडाच्या दांड्याने त्यांना तारांपासून दूर केले व बारामती येथील रुग्णालयात नेण्यात आले. मात्र, उपचारापूर्वीच त्यांचा मृत्यू झाला. त्यांच्या पश्चात पत्नी आणि एक मुलगा व एक मुलगी परिवार आहे.

ग्रामस्थांनी सांगितले की, येथील रस्त्यावरून लोंढेवस्ती नजिक शेती पंपांना वीजपुरवठा करणाऱ्या तारा तीन महिन्यांपूर्वी अज्ञात ट्रकच्या धडकेत तुटल्या होत्या. त्यामुळे विजेच्या तारांना झोळ पडून त्या जमिनीजवळ आल्या व बंद असलेल्या तारांना अचानक वीज प्रवाह उतरल्याने हा अपघात घडला.
याबाबत जळगाव कडेपठार येथील महावितरण शाखा कार्यालयाचे शाखा अभियंता कांताराम भंडलकर यांनी घटनास्थळी पाहणी करून सांगितले, “वीज प्रवाह सुरू असताना झाडे तोडल्यामुळे एक झाड तारांवर पडले. त्यामुळे बंद असलेल्या तारांना विद्युत पुरवठा उतरला असावा आणि त्यातून हा अपघात घडला असावा. ”

02974