उंडवडी कडेपठार- जेजुरी मार्गाचे काम रखडले

उंडवडी, ता. १६ : उंडवडी कडेपठार (ता. बारामती) ते पाटस रस्त्याला जोडणाऱ्या जुन्या जेजुरी रस्त्याचे काम रखडले आहे. त्यामुळे वाहनचालकांसह विद्यार्थ्यांची गैरसोय होत आहे.
उंडवडी कडेपठार ते बारामती- पाटस जुना जेजुरी मार्गाच्या कामाला गेल्यावर्षी सार्वजनिक बांधकाम विभागाकडून १५ लाख रुपये निधी मंजूर झाला आहे. हा रस्ता साधारण दोन किलोमीटर अंतराचा असून, सोनवडी सुपे ते उंडवडी कडेपठार, जळगाव सुपे व अंजनगाव या गावांना जोडणारा महत्त्वपूर्ण व जवळचा मार्ग आहे.
या रस्त्याचे काम सुरू झाल्यानंतर काही शेतकऱ्यांनी हरकती घेतल्या होत्या. मात्र, शेतकऱ्यांनी अंतर्गत वाद मिटवून जमिनीची मोजणीही करून दिली असून, दोन महिने उलटले तरी काम सुरू झालेले नाही. त्यामुळे वाहनचालकांसह विद्यार्थ्यांना मोठ्या गैरसोयीचा सामना करावा लागत आहे. या रस्त्याने सोनवडी सुपे येथील विद्यार्थ्यांना दररोज उंडवडी कपच्या श्री भैरवनाथ विद्यालयात जावे लागते. या विद्यार्थ्यांना ये- जा करताना चिखल, पाण्यातून मार्ग काढावा लागत आहे.
निधी मंजूर असूनही प्रत्यक्ष काम सुरू न झाल्यामुळे स्थानिक नागरिकांकडून नाराजी व्यक्त होत आहे. रस्ता पूर्ण झाल्यानंतर उंडवडी- पाटस मार्गावरून जाणाऱ्या प्रवाशांना सुरक्षित व दर्जेदार रस्त्याची सुविधा मिळणार आहे.

येथील रस्त्याच्या कामातील अडचणी दोन महिन्यापूर्वीच सुटल्या आहेत. रस्त्याचे काम तातडीने पूर्ण करण्यासाठी आम्ही सार्वजनिक बांधकाम विभागाकडे पाठपुरावा करत आहोत.
- रूपाली जराड, सरपंच, उंडवडी कडेपठार

02981