उंडवडीमध्ये स्मशानभूमीतील बैठक शेड रखडले

उंडवडी, ता. १८ : उंडवडी कडेपठार (ता. बारामती ) येथील स्मशानभूमीसाठी मंजूर झालेल्या बैठक शेड बांधकामाच्या कामाचे भूमिपूजन होऊन वर्ष उलटले, तरी प्रत्यक्ष कामाला सुरवात झालेली नाही. त्यामुळे ग्रामस्थांमध्ये नाराजीचे वातावरण आहे.
या कामाचे भूमिपूजन जुलै २०२४ मध्ये पार पडले होते. मात्र त्यानंतर ठेकेदाराने काम सुरू न केल्याने ग्रामस्थांना अनेकदा पावसात, उन्हात अंत्यविधी करावा लागला. येथील ग्रामस्थांच्या मागणीनुसार ग्रामपंचायतीने या शेडसाठी जिल्हा परिषदेकडे प्रस्ताव पाठवून, पाठपुरावा करून १५ लाखांचा निधी मंजूर करून घेतला होता. मात्र, निधी उपलब्ध असूनही काम ठप्प आहे. त्यामुळे सार्वजनिक बांधकाम विभाग आणि ठेकेदारांच्या दुर्लक्षावर ग्रामस्थांनी प्रश्नचिन्ह उपस्थित केले आहे.

बैठक शेडचे काम तातडीने पूर्ण व्हावे यासाठी आम्ही सार्वजनिक बांधकाम विभाग व उपमुख्यमंत्री अजित पवार यांना पत्रव्यवहार केला आहे; मात्र अद्यापही काम सुरू झालेले नाही.
- रुपाली जराड, सरपंच, उंडवडी कडेपठार.