कारखेलमध्ये २७८ नागरिकांची तपासणी

उंडवडी, ता. ७ : कारखेल ( ता.बारामती) येथे मुख्यमंत्री समृद्ध पंचायतराज अभियानांतर्गत सर्वरोग निदान शिबिराचे आयोजन करण्यात आले. या शिबिरात २७८ नागरिकांची तपासणी करण्यात आली.
या शिबिराचे उद्‍घाटन बारामती पंचायत समितीचे गटविकास अधिकारी किशोर माने व तालुका आरोग्य अधिकारी डॉ. मनोज खोमणे यांच्या हस्ते करण्यात आले. याप्रसंगी डॉ. पांडुरंग गावडे यांनी आरोग्य आणि व्यायामाचे महत्त्व या विषयावर मार्गदर्शन केले. गावडे हॉस्पिटल, बुधराणी हॉस्पिटल, बारामती हॉस्पिटल, तसेच प्राथमिक आरोग्य केंद्र मोरगाव व ग्रामपंचायत कारखेल यांचा शिबिराच्या नियोजनात सहभाग होता. मोफत आरोग्य तपासणीबरोबरच प्राथमिक उपचारांची सुविधाही शिबिरामध्ये उपलब्ध करून देण्यात आली होती.
सहाय्यक गटविकास अधिकारी नंदन जरांडे, सामाजिक कार्यकर्ते रोहिदास चव्हाण, आत्माराम वाबळे सरपंच वैशाली रणसिंग, उपसरपंच प्रणाली कडाळे, ग्रामसेवक दादासाहेब बंडगर आदींनी शिबिराच्या यशस्वी आयोजनासाठी परिश्रम घेतले. संदीप वाबळे व हिरामण लोंढे यांनी सूत्रसंचालन केले.