कोरेगावात जागेच्या वादातून महिलेस मारहाण

उरुळी कांचन, ता. ३१ : कोरेगाव मूळ (ता. हवेली) परिसरातील मोरे वस्ती येथे रविवारी (ता. २७) दुपारी चारच्या सुमारास गायरान जागेवरून जातिवाचक शिवीगाळ करत मारहाण केल्याची घटना घडली. या प्रकरणी एका महिलेने आणि स्वप्नील पांडुरंग मोरे (वय २७, रा. कोरेगाव मूळ, मोरे वस्ती, ता. हवेली) यांनी उरुळी कांचन पोलिस ठाण्यात एकमेकांविरोधात फिर्याद दिली आहे.
पोलिसांनी महिला व समाधान परशुराम अवचट (रा. दोघेही कोरेगाव मूळ), तसेच स्वप्नील पांडुरंग मोरे, विजय मारुती शिंदे, केतन बाळासाहेब सोनवणे (रा. सर्व कोरेगाव मूळ, मोरे वस्ती, ता. हवेली) या एकमेकांविरोधात गुन्हे दाखल केले आहेत.
उरुळी कांचन पोलिसांनी दिलेल्या माहितीनुसार, फिर्यादी महिला या मुले आणि आईसह कोरेगावमूळ येथे राहतात. त्या मजुरी करून कुटुंबाचा उदरनिर्वाह करतात. त्यांच्या घराला लागून न्हाणी आहे. त्याच्या शेजारी मोकळी गायरान जागा आहे. या जागेत रविवारी (ता. २७) दुपारी चारच्या सुमारास स्वप्नील मोरे यांनी खड्डा खोदण्यास सुरुवात केली. तेव्हा फिर्यादी महिलेने मोरे यांनी तुम्ही माझ्या न्हाणी जवळ कशाला खड्डा करत आहेस, आम्ही अंघोळ कसे करणार? असे विचारले असता तेव्हा स्वप्नील मोरे याने जागा तुमच्या बापाची नाही, ही गायरान जागा आहे, असे म्हणत शिवीगाळ केली. त्यावेळी फिर्यादी महिला यांचा भाऊ समाधान अवचट हा तेथे आला असता त्याला विजय मारुती शिंदे, केतन बाळासाहेब सोनवणे यांनी शिवीगाळ करत हाताने मारहाण केली. त्यावेळी स्वप्नील याने फिर्यादीला वीट फेकून मारली.