देसाई महाविद्यालयात रक्त कर्करोग जागरूकता कार्यशाळा

उरुळी कांचन, ता. ४ : येथील पद्मश्री मणिभाई देसाई महाविद्यालय आणि विद्यार्थी विकास मंडळाच्या वतीने महाविद्यालयात बुधवारी (ता. ३) रक्त कर्करोग जागरूकता अभियान कार्यशाळेचे आयोजन केले होते. वरिष्ठ समन्वयक सोनाली धस (दात्री रक्त स्टेम सेल डोनर रजिस्ट्री) यांच्या हस्ते कार्यशाळेचे उद्‍घाटन करण्यात आले.
धस यांनी महाविद्यालयीन विद्यार्थ्यांमध्ये रक्त कर्करोग जागरूकतेचे महत्त्व अधोरेखित केले. दुसऱ्या सत्रादरम्यान, महाविद्यालयाच्या कर्मवीर भाऊराव पाटील कमवा आणि शिका’ योजनेतील स्वयंसेवक आणि दात्री फाउंडेशनच्या प्रतिनिधींनी रक्त कर्करोग जागरूकता मोहिमेचे महत्त्व सांगून प्रत्येक वर्गाला भेट दिली. दात्री फाउंडेशनच्या सहकार्याने, प्राध्यापक आणि विद्यार्थ्यांसह एकूण ३६३ स्वयंसेवकांनी रक्त कर्करोग उपचार उपक्रमांना पाठिंबा देण्यासाठी नोंदणी केली. याप्रसंगी विद्यार्थी विकास अधिकारी डॉ. अमोल बोत्रे, प्राचार्य डॉ. शिवाजी बोऱ्हाडे, उपप्राचार्य डॉ. अविनाश बोरकर आदी उपस्थित होते. बंडू उगडे यांनी सूत्रसंचालन, तर प्रतीक्षा कोद्रे यांनी स्वागत केले. सुमेघ बडेकर यांनी आभार मानले.