काळभोर महाविद्यालयात अभ्यास मंडळ सुरू

उरुळी कांचन, ता. २४ : लोणी काळभोर (ता. हवेली) येथील समाजभूषण गणपतराव काळभोर महाविद्यालयात इतिहास अभ्यास मंडळ सुरू केले आहे. विद्यार्थ्यांमध्ये इतिहासाविषयी ओढ निर्माण करून, संशोधन व राष्ट्रीय वारसा जतन करण्याची नवी दिशा देण्याच्या उद्देशाने हा उपक्रम राबविण्यात आला.
‘‘मी इतिहास विषयाचा प्राध्यापक आहे. आजवर २७ पुस्तके लिहिली असून, ती महाराष्ट्रातील अनेक विद्यापीठांमध्ये संदर्भग्रंथ व अभ्यासक्रमासाठी वापरली जातात. हजारो विद्यार्थी त्याचा अभ्यास करत आहेत. सावित्रीबाई फुले पुणे विद्यापीठात संशोधन मार्गदर्शक म्हणून कार्य करताना मला १२ संशोधकांना मार्गदर्शन करण्याची संधी मिळाली, याचा मला अभिमान वाटतो. भारताच्या पाच हजार वर्षांच्या गतवैभवाचा तसेच आधुनिक भारतातील विविध घटना-प्रसंगांचा समतोल अभ्यास करून त्याची ऐतिहासिक नोंद घेणे आवश्यक आहे. त्यातूनच विद्यार्थ्यांचा सर्वांगीण बौद्धिक विकास होईल,’’ असा विश्वास प्राचार्य डॉ. अंबादास मंजुळकर यांनी व्यक्त केला.
याप्रसंगी सांस्कृतिक विभाग प्रमुख डॉ. शिवाजी गायकवाड, सतीश कुदळे, एस. एस. पाटील, गीतांजली चव्हाण, डॉ. अमोल बोत्रे, सुहास नाईक, यशश्री जैनजांगडे, प्रतीक लोंढे आदी उपस्थित होते. विद्यार्थिनी संजीवनी कोळेकर हिने सूत्रसंचालन केले, तर गणेश जाधव याने आभार मानले.