आपत्तीग्रस्तांना जीवनावश्यक वस्तूंचे वाटप

उरुळी कांचन, ता. ५ : राष्ट्रवादी कॉंग्रेस पक्षातील प्रदेश सरचिटणीस दत्तात्रेय काळे यांच्या वतीने आपत्तीग्रस्तांना २००० जीवनावश्यक वस्तूंच्या किटचे वाटप केले. माढा तालुक्यातील मुंगशी, नाडी, कुर्डुवाडी, आष्टी येथील आपत्तीग्रस्तांना चादर, बेडशीट, धान्य, कपडे, मसाले, किराणा माल आदी साहित्य देण्यात आले. याप्रसंगी सामाजिक कार्यकर्ते रोहन बारस्कर, बापू सोनवणे, प्रशांत कल्याणकर यांनी सहकार्य केले.
महाराष्ट्रातील सोलापूर, बीड, धाराशिव, लातूर, परभणी जिल्ह्यांमध्ये अतिवृष्टी झाल्याने गावांमध्ये पूरपरिस्थिती निर्माण झाली होती. या गावात अनेक भागात पुराचे पाणी शिरले, अनेक कुटुंबांचे संसार उघड्यावर पडले आहेत. सामाजिक बांधिलकीची जाणीव ठेवून आपण सर्वांनी एकत्र येऊन मदत नव्हे, तर कर्तव्य म्हणून मदत कार्य सुरू करावे. यासाठी पुढाकार घेऊन जास्तीत जास्त लोकांनी आपल्याला जमेल तशी मदत करावी, असे आवाहन काळे यांनी केले आहे.