‘जॉय ऑफ गिव्हिंग विक’ उपक्रमांतर्गत उरुळी कांचनमध्ये सामाजिक बांधिलकी

उरुळी कांचन, ता. २९ : दिवाळीच्या उत्साहात केवळ आनंद साजरा न करता समाजाप्रती आपली जबाबदारीही विद्यार्थ्यांनी ओळखावी, या हेतूने पवार पब्लिक स्कूल, हिंजवडीच्या वतीने ‘जॉय ऑफ गिव्हिंग विक’ हा सामाजिक उपक्रम राबविण्यात आला. प्राचार्य दीपा शानबाग व विभाग प्रमुख सुनंदा अजित यांच्या मार्गदर्शनाखाली हा उपक्रम पार पडला.
या उपक्रमात विद्यार्थ्यांना ‘एक विद्यार्थी - एक वस्तू’ हे आवाहन केले होते. प्रत्येक विद्यार्थ्याने घरून एक वस्तू आणली व त्या वस्तू एकत्रित करून गरजूंना मदतीचा हात देण्यात आला. संकलित वस्तूंपैकी किराणा साहित्याचे किट तयार करून ते महावीर निवासी मूकबधिर विद्यालय, उरुळी कांचन आणि गुरुदत्त निवासी प्राथमिक-माध्यमिक विद्यालय या ठिकाणी वितरित करण्यात आले.
यावेळी बोलताना शिक्षिका मनीषा मदने म्हणाल्या की, दिवाळीच्या दिव्यांप्रमाणे तुमचा अभ्यास आणि उज्ज्वल भविष्य उजळत राहो. अंधारावर प्रकाशाचा विजय साजरा करणाऱ्या या सणात ज्ञानाचा प्रकाशही तितकाच महत्त्वाचा आहे. समाजमाध्यमांवर वेळ वाया घालविण्याऐवजी मोबाईलचा उपयोग शासकीय योजनांची माहिती मिळवण्यासाठी करा.