अजित सहकारी संस्थेतर्फे सभासदांना १५ टक्के लाभांश

वडगाव निंबाळकर, ता. १९ : होळ सदोबाचीवाडी (ता. बारामती) येथील अजित विविध कार्यकारी सेवा सहकारी संस्थेची वार्षिक सर्वसाधारण सभा नुकतीच पार पडली. यामध्ये सभासदांसाठी १५ टक्के लाभांश जाहीर केला.
संस्थेला ब वर्ग मिळाला असून बँक पातळीवर शंभर टक्के वसुली आहे. संस्थेने यावर्षी देखील लाभांश देण्याची परंपरा कायम राखल्यामुळे सभासदांनी समाधान व्यक्त करत कामकाजाविषयी माहिती जाणून घेतली. संस्थेचे सचिव किरण तावरे यांनी अहवाल वाचन केले.
प्रतीभा ग्रामीण बिगर शेती सहकारी पतसंस्थेची वार्षिक सभा याच ठिकाणी पार पडली. संस्थेने यावर्षी ११ टक्के लाभांश जाहीर केला. यावेळी उपस्थित सभासदांनी संस्थेचे होणारे कर्ज वाटप संस्थेतील एकूण ठेवींची संख्या याबाबतची माहिती जाणून घेत सभेत सहभाग नोंदवला. सचिव सदाशिवराव सूर्यवंशी यांनी अहवाल वाचन केले.
दोनही संस्थांच्या वार्षिक सभेच्या अध्यक्षस्थानी बारामती तालुका दूध संघाचे माजी अध्यक्ष बापूराव सूर्यवंशी होते. यावेळी सोमेश्वर कारखान्याचे माजी संचालक विनायकराव पिसाळ, अजित सोसायटीचे अध्यक्ष दादासाहेब सूर्यवंशी, विठ्ठलराव पिसाळ, भालचंद्र भोसले, अंकुशराव जगताप, बबनराव सूर्यवंशी आदी उपस्थित होते. सभा खेळीमेळीच्या वातावरणात पार पडली. दोन्ही संस्थांच्या सभासदांनी संस्थेचे घेतलेले कर्ज ठरलेल्या मुदतीत परतफेड केले परिणामी शंभर टक्के वसुली झाली. संस्था वाढीसाठी सभासदांचे पाठबळ महत्त्वाचे ठरते. यापुढेही सभासद संस्थेचे हित लक्षात ठेवून, सहकार्य करतील अशी अपेक्षा बापूराव सूर्यवंशी यांनी व्यक्त केली.