कोऱ्हाळ्यात रंगली कवितांची मैफील

वडगाव निंबाळकर, ता. ११ : बारामती तालुक्यातील साहित्य क्षेत्राला नवी ओळख देणारा आणि नवोदित कवींना प्रोत्साहन देणारा एक आगळावेगळा उपक्रम पंचक्रोशी प्रकाशन होळ यांच्यावतीने नुकताच राबविण्यात आला. कविवर्य मोरोपंतांच्या साहित्य परंपरेला साजेसा असा कविसंमेलनाचा सोहळा नीरा-बारामती मार्गावरील कोऱ्हाळे (ता. बारामती) येथे उत्साहात पार पडला.
कार्यक्रमाच्या अध्यक्षस्थानी गझलकार प्रमोद जगताप होते. प्रमुख पाहुणे पाठ्यपुस्तकातील लेखिका आणि अभिनेत्री अंजली अत्रे महाराष्ट्र राज्य पाठ्यपुस्तक निर्मिती मंडळाचे विशेष अधिकारी मोगल जाधव, रानकवी लक्ष्मण शिंदे, कवयित्री सुनंदा करचे उपस्थित होते.
तालुक्यातील नवोदित कवींना व्यासपीठ तयार करून देण्याचे काम आम्ही बारामतीकर या विशेष अंकाने केले आहे. याचे प्रकाशन दत्तात्रेय गावडे महाराज यांच्या हस्ते झाले. या वेळी पुणे जिल्हा बँकेचे संचालक संभाजी होळकर ज्येष्ठ साहित्यिक प्रा. रवींद्र कोकरे, पाठ्यपुस्तकातील कवी हनुमंत चांदगुडे उपस्थित होते.
कवी संमेलनात परिसरातील ७६ कवी कवयित्रींनी सहभाग घेतला. यामध्ये सोमनाथ सुतार, अभिमन्यू भगत, संजय मोरे, सोपानराव आटोळे, दसू भोसले, सुजाता शिंदे, वनिता जाधव, स्वाती सुरते, संगीता देशमुख, ऊर्मिला झगडे आदींनी सादर केलेल्या कविता लक्षवेधी ठरल्या. जयश्री माजगावकर, राहुल शिंदे यांनी सूत्रसंचालन केले. अलका रसाळ यांनी आभार मानले. ‘‘वाचन हेच सृजनाचे बीज आहे, कवितेतून समाजाचे प्रतिबिंब दिसले पाहिजेत. लिहिते व्हा,’’ असा सल्ला साहित्यिक प्रा. कोकरे यांनी दिला.