पितृपंधरवड्यामुळे भाज्यांच्या दरात वाढ

वडापुरी, ता. १३ : सध्या पितृपंधरवडा सुरू झाल्याने नैवद्यासाठी लागणाऱ्या भाज्यांना मोठ्या प्रमाणात मागणी वाढली आहे. त्यामुळे ग्रामीण भागात भरणाऱ्या आठवडे बाजारात भाज्यांचे दर कडाडले आहेत.
इंदापूर तालुक्याच्या आठवडे बाजारात एरवी अगदी किरकोळ भावात उपलब्ध होणाऱ्या भाज्या सध्या मोठ्या दराने व्यापारी बाजारात विकत असल्याचे चित्र पहावयास मिळत आहे. यामध्ये गवार, भोपळा, मेथी या भाज्यांचा भाव सर्वाधिक आहे. गेल्या काही दिवसांपूर्वी ४० ते ५० रुपये किलो मिळणारी गवार सध्या ६० ते ८० रुपये किलो मिळू लागली आहे. भोपळा, कारले, चवळी, भेंडी, अळूचे पान, दोडके या भाजीपाल्यांसाठी मोठ्या प्रमाणात पैसे मोजावे लागत आहे. अशातच कोंथिबीर, मेथी, शेपू व पालक जुडीचे दर २० ते ४० रुपयांवर पोचले आहेत, तर फ्लॉवर ३० ते ५० रुपये किलो दराने विकली जात आहे.
भाज्यांचे दर (प्रतिकिलो रुपयांत) -
गवार : ६० - ८०, कारले : ५०, हिरवी मिरची : ४०- ५०, अळूचे पान - १० -२० (जुडी), मेथी २०-४० रुपये (जुडी), कोथिंबीर : १५ - ३० जुडी.