रस्त्याची पाहणी केल्याने सरपंचांवर हल्ला

वेल्हे, ता. १६ : कादवे (ता. राजगड) गावच्या ग्रामपंचायतीच्या विहिरीकडे जाणाऱ्या रस्त्याची सरकारी अधिकाऱ्यांसह पाहणी केल्याच्या कारणावरून भावासह कादवे गावचे सरपंच अनंता गणपत बिरामणे (वय ४५) यांच्यावर पाळीव कुत्र्यासह काठ्या व दगडांनी हल्ला केल्याची घटना सोमवारी (ता. १५) दुपारी साडेबारा वाजण्याच्या सुमारास घडली. या प्रकरणी वेल्हे पोलिस ठाण्यात रात्री उशिरा गुन्हा दाखल केला आहे.
या हल्ल्यात सरपंच अनंता बिरामणे व त्यांचा भाऊ विनोद गणपत बिरामणे (वय ४०) हे जखमी झाले आहेत. याप्रकरणी वेल्हे पोलिसांनी हल्लेखोर अर्जुन बापू शिर्के (वय २१) व करण बापू शिर्के (वय २३, दोघेही रा. शिर्केवाडी, कादवे) यांना सोमवारी रात्री उशिरा अटक केली आहे. तर, सरपंच अनंता बिरामणे यांच्या अंगावर पाळीव कुत्रे सोडून काठीने मारहाण करणाऱ्या शकुंतला मारुती शिर्के यांच्या विरोधात गुन्हा दाखल केला आहे. या प्रकरणी वेल्हे पोलिस ठाण्याचे सहायक पोलिस निरीक्षक नितीन खामगळ यांच्या देखरेखीखाली पोलिस अंमलदार अजय शिंदे तपास करत आहेत.
याबाबत वेल्हे पोलिसांनी सांगितले की, कादवे शिर्केवाडी येथील ग्रामपंचायतीच्या विहिरीकडे जाणाऱ्या रस्त्याची काही लोकांनी जाणूनबुजून अडवणूक केली आहे. त्याबद्दल कादवे ग्रामपंचायतीच्या वतीने विहिरीकडे जाण्यासाठी रस्ता मिळावा यासाठी राजगड तालुका तहसील व प्रांत अधिकारी व इतर सरकारी कार्यालयांमध्ये अर्ज केले आहेत. त्या अनुषंगाने सोमवारी सकाळी सरकारी अधिकारी अडवणूक केलेल्या रस्त्याची स्थळ पाहणी करण्यासाठी आले होते. अधिकारी पाहणी करून निघून गेल्यावर चिडून जाऊन अर्जुन बापू शिर्के, करण बापू शिर्के व शकुंतला मारुती शिर्के यांनी संगनमताने सरपंच अनंता बिरामणे व कादवे गावचे पोलिस पाटील भाऊसाहेब भागूजी ढेबे यांना शिवीगाळ व दमदाटी केली. त्यावेळी करण शिर्के व अर्जुन शिर्के याने सरपंच अनंता बिरामणे व त्याचा भाऊ विनोद बिरामणे यांना दगड व लाथाबुक्क्यांनी बेदम मारहाण केली. यावेळी शकुंतला शिर्के यांनी त्यांच्या घरातील पाळीव कुत्रे सरपंच अनंता बिरामणे यांच्या अंगावर सोडले.