राजगडमध्ये रोहित्र चोरीच्या घटनांमध्ये वाढ

वेल्हे, ता. ११ ः राजगड तालुक्यात गेल्या १५ दिवसांमध्ये विद्युत रोहित्रांमधून तांब्याच्या तारांच्या चोरीच्या घटना वाढल्या आहेत. त्यामुळे महावितरण विभागाचे लाखो रुपयांचे नुकसान झाले आहे.
रात्रीच्या थंडीचा फायदा घेत चोरीच्या घटना वाढू लागल्या आहेत. या चोरीच्या वाढत्या घटनांना आळा घालण्यासाठी वेल्हे पोलिस ठाण्यामार्फत सहाय्यक पोलिस निरीक्षक किशोर शेवते यांनी सर्वसामान्य नागरिक, शेतकरी, व्यावसायिक, महिला, विद्यार्थी, पोलिस पाटील, शासकीय कर्मचारी आणि सर्व ग्रामस्थांना सतर्क राहण्याचे आवाहन केले आहे.
गावात येणारे अनोळखी व्यक्ती किंवा दिवसा रोहित्र परिसरात संशयास्पदरीत्या फिरणाऱ्या व्यक्तींना हटकून विचारपूस करावी, तसेच प्रकार कोणताही संशयास्पद आढळल्यास त्वरित वीजवितरण विभाग अथवा पोलिस ठाण्याशी संपर्क साधावा, असे पोलिसांनी सांगितले आहे.
रात्रीच्या वेळी वीज पुरवठा खंडित झाल्यास नागरिकांनी तत्काळ वीजवितरण विभागाशी संपर्क साधावा आणि दोन- तीन जणांनी जवळच्या रोहित्राची पाहणी करावी. लाइट गेल्यानंतर साधारण अर्ध्या तासात चोरीची शक्यता जास्त असल्याचे निरीक्षण पोलिसांनी नोंदवले आहे. तत्काळ पाहणी केल्यास चोरी रोखली जाऊ शकते, असेही पोलिसांनी सांगितले आहे.
गेल्या वर्षीही राजगड तालुक्यात महावितरणच्या हाय टेन्शन लाइनचा टॉवर पाडून तारा चोरीचे प्रकार घडले होते. सध्या सक्रिय असलेल्या टोळ्या रोहित्रातील तांबे, अॅल्युमिनियम आणि तेलाची चोरी करत असून, या वस्तूंना बाजारात मोठी किंमत मिळत असल्याने अशा गुन्ह्यांत वाढ झाली आहे.

त्वरित संपर्क साधा
या पार्श्वभूमीवर पोलिसांनी नागरिकांना अधिक जागरूक राहण्याचे आणि पोलिस व महावितरण विभागाला सहकार्य करण्याचे आवाहन केले आहे. कोणताही संशय, हालचाल किंवा चोरीचा प्रयत्न दिसताच वेल्हे पोलिस ठाण्याच्या ०२१३०-२२१२३३ या क्रमांकावर किंवा डायल ११२ वर तत्काळ संपर्क साधावा, असे आवाहन करण्यात आले आहे.

राजगड तालुक्यात रोहित्र चोरी रोखण्यासाठी व अशा गुन्ह्यांना आळा घालण्यासाठी नागरिकांचे सहकार्य अत्यंत महत्त्वाचे आहे. कोणताही संशयास्पद प्रकार दिसताच तत्काळ पोलिसांना कळवावे. आपल्या सतर्कतेमुळे चोरी रोखणे शक्य होईल.
- किशोर शेवते, प्रभारी सहाय्यक पोलिस निरीक्षक, वेल्हे पोलिस ठाणे