संत तेल्या भुत्याच्या कावडीने सर केला मुंगी घाट

खळद, ता. ९ : शिखर शिंगणापूर (जि. सातारा) येथे मानाच्या खळद, खानवडी, एखतपूर, मुंजवडी, कुंभारवळण या पंचक्रोशीच्या संत तेल्या भुत्याच्या कावडीने मुंगी घाट मानवी साखळीच्या साह्याने सर केला. भुतोजीबुवा तेली यांचे वंशज नाना महाराज खळदकर यांच्या मार्गदर्शनाखाली ‘हर हर महादेव’चा जयघोष करीत अवघड घाट पार करत शंभू महादेवाला कऱ्हेच्या जलाने अभिषेक घातला.
रामनवमीला (ता. ६) एखतपूर (ता. पुरंदर) येथील कावड सोहळा कोळविहिरे, जोगवडी, वडगाव निंबाळकर, जिंती, फलटण, निंबळक नाका असा प्रवास करत बुधवारी (ता. ९) पहाटे रणखिळा येथून सकाळी कोथळे येथे पोहोचला. प्रशासनाच्या वतीने सोहळ्याचे स्वागत करण्यात आले. तर नानासाहेब तेली महाराज (इस्लामपूर) यांच्या कावडीची भेट तसेच लहान मोठ्या काठ्या कावडी यांची भेट होऊन दुपारी २ वाजता कावडीचे मुंगीघाटाकडे मार्गस्थ झाली. घाट पायथ्याशी माजी आमदार संजय जगताप यांनी कावडीचे स्वागत केले. यानंतर महाआरती होऊन कावडीचा घाट चढण्यास प्रारंभ झाला.
ढोल ताशांच्या गजरात, सनईच्या निनादात दोराशिवाय केवळ मानवी साखळीच्या साह्याने ‘हर हर महादेव’चा जयघोष करत घाटाची चढण पार केली. हा क्षण पाहण्यासाठी घाट माथ्यावर भाविकांनी गर्दी केली होती. कावडीचे स्वागत उपविभागीय महसूल अधिकारी उज्वला गाडेकर, उपविभागीय पोलिस अधिकारी अश्‍विनी शेंडगे, तहसीलदार विकास अहीर, माण पंचायत समितीचे गटविकास अधिकारी प्रदीप शेंडगे, दहिवडी सहाय्यक पोलिस निरीक्षक दत्तात्रेय दराडे, अक्षय सोनवणे, दत्तात्रेय झुरंगे, देविदास कामथे यांनी केले. कावड प्रथम अमृतेश्‍वर मंदिर आणि नंतर मुख्य मंदिरात नेऊन कऱ्हेचा जलाभिषेक केला.

यात्रेची आख्यायिका
संत भुतोजी तेली महाराज राहत्या घराला आग लावून शिखर शिंगणापूर यात्रेस कावड घेऊन बिना दोराने मुंगी घाट चढत असे. यात्रेवरून घरी परतल्यानंतर त्यांचे घर पूर्वीप्रमाणे जसेच्यातसे असायचे, हा चमत्कार सांगितला जातो. ही कावडीची परंपरा पंचक्रोशीतील शिवभक्तांनी पुढे सुरू ठेवली आहे. संत भुतोजी तेली यांची समाधी, जळत्या घराची जागा आणि तेलाचा घाणा आजही एखतपूर (ता. पुरंदर) आहे.