नीरा शाळेस सहा संगणक भेट

वाल्हे, ता. २० : नीरा (ता. पुरंदर) येथील रयत शिक्षण संस्थेच्या सौ लीलावती रिखवलाल शहा कन्या विद्यालयाला पुणे विजयनगर येथील लायन्स क्लबच्या वतीने सहा संगणक, ग्रंथालयासाठी पुस्तके आणि विविध प्रकारची २५ झाडे भेट देण्यात आली. या उपक्रमाचा उद्देश विद्यार्थ्यांना आधुनिक तंत्रज्ञानाची ओळख करून देणे, संगणकाच्या साहाय्याने त्यांच्या शिक्षणात गुणवत्ता वाढविणे आणि पर्यावरण संवर्धनाचा संदेश देणे असा होता.
कार्यक्रमाची सुरुवात कर्मवीर भाऊराव पाटील यांच्या प्रतिमा पूजनाने करण्यात आली. क्लबचे अध्यक्ष राजश्री शेठ, विभागीय अध्यक्ष विपिन शेठ यांच्या हस्ते मुख्याध्यापिका निर्मला माने व पर्यवेक्षिका अनुराधा उरमोडे यांच्याकडे संगणक व पुस्तके सुपूर्द करण्यात आली. याप्रसंगी क्लबचे सदस्य शेखर शेठ, अरुण शेठ, पांडुरंग देशपांडे, संगीता शेठ, नीलेश कवितकर, रवींद्र बांडे, शाळा समिती सदस्य अनिल चव्हाण, संतोष गांधी, तनुजा शहा आदी उपस्थित होते. उरमोडे यांनी प्रास्ताविक, तर माया गायकवाड, अश्विनी खोपे यांनी सूत्रसंचालन केले. माने यांनी आभार मानले.