पिसुर्टी शाळेच्या वर्गखोलीचे बांधकाम रखडले

वाल्हे, ता. ११ : पिसुर्टी (ता. पुरंदर) येथील जिल्हा परिषद प्राथमिक शाळेसाठी जिल्हा नियोजन समितीमार्फत मंजूर झालेल्या नव्या वर्गखोलीचे बांधकाम
तब्बल वर्षभरापासून रखडले आहे. ठेकेदाराच्या निष्काळजीपणामुळे हे काम अर्धवट सोडून दिल्याने गंभीर परिस्थिती निर्माण झाली असून ग्रामस्थ, पालक
व शिक्षकांमधून तीव्र नाराजी व्यक्त होत आहे.
गतवर्षी जिल्हा नियोजन समितीकडून वर्गखोलीसाठी निधी मंजूर होऊन निविदा प्रक्रियेद्वारे हे काम उपठेकेदार जावेद शेख यांना देण्यात आले होते.
सुरुवातीला काही दिवस काम केल्यानंतर ठेकेदाराने अचानक काम बंद केले. बांधकामाची गुणवत्ता अत्यंत निकृष्ट असून पायाभूत बांधकामासाठी आवश्यक
तेवढे पाणीही मारले गेले नसल्याचा आरोप ग्रामस्थांनी केला आहे. कामातील अनियमितता, उणिवा आणि संथ गतीबाबत शाळा व्यवस्थापन समिती, शिक्षक व
ग्रामस्थांनी पंचायत समितीचे बांधकाम अभियंता अजय गावडे यांना अनेकवेळा तोंडी व लेखी तक्रारी केल्या. मात्र, त्यानंतरही कामात कोणतीही सुधारणा न
झाल्याने प्रशासकीय यंत्रणेबाबतही ग्रामस्थांत रोष निर्माण झाला आहे.
शाळा व्यवस्थापन समितीचे अध्यक्ष दादा बरकडे व सदस्य शीतल बरकडे म्हणाले की, ठेकेदार जावेद शेख यांच्याशी वारंवार संपर्क साधून विचारणा
केली असता ते फोन उचलतच नाहीत. काम पूर्ण होईल का? याची चिंता पालक आणि शिक्षकांना वाटू लागली आहे. विद्यार्थ्यांच्या सुरक्षितता आणि शैक्षणिक सुविधा लक्षात घेता ग्रामस्थांनी जिल्हा परिषद प्रशासनाकडे धाव घेत ठेकेदारावर तातडीने कारवाई करण्याची मागणी केली आहे.
निकृष्ट आणि निष्काळजी काम गावाने मान्य करणार नाही. ठेकेदाराची निवड रद्द करून नवीन ठेकेदारामार्फत दर्जेदाररीत्या बांधकाम त्वरित पूर्ण करावे, अशी ठाम भूमिका खंडू बरकडे यांनी व्यक्त केली.

पिसुर्टी शाळेच्या वर्गखोलीच्या कामाबाबत प्राप्त झालेल्या तक्रारी आम्ही गांभीर्याने घेतल्या आहेत. ठेकेदाराला नोटीस देण्यात आली असून कामातील उणिवांबाबत स्पष्टीकरण मागवले आहे. दर्जा राखून काम वेळेत पूर्ण होणे आवश्यक आहे. जर ठेकेदाराने समाधानकारक प्रतिसाद दिला नाही, तर त्याच्यावर कारवाई करण्याची आणि काम दुसऱ्या ठेकेदाराकडे देण्याची प्रक्रिया राबविली जाईल.
- अजय गावडे, पंचायत समितीचे बांधकाम अभियंता