महसूल अधिकाऱ्यावर थोपटेवाडी येथे हल्ला

वाल्हे, ता. ११ : थोपटेवाडी (ता. पुरंदर) परिसरात अवैध क्रशर वाहतुकीवर कारवाई करताना ग्राम महसूल अधिकाऱ्यावर हल्ला करून डंपरसह माल पळवून नेल्याची गंभीर घटना बुधवारी (ता. १०) घडली आहे. याप्रकरणी जेजुरी पोलिस ठाण्यात दोघांवर गुन्हा दाखल करण्यात आला असून, आरोपींचा शोध सुरू आहे.
याबाबत जेजुरी पोलिस ठाण्यामध्ये गुळुंचे ग्राममहसुल अधिकारी शरद मारुती लोंढे यांनी फिर्याद दिली आहे. याबाबत अधिक माहिती अशी की, बुधवारी दुपारी थोपटेवाडी- गुळुंचे रस्त्यावर डंपर अवैधरीत्या क्रशरचा माल वाहतूक करत असल्याचे आढळले. लोंढे यांनी डंपर ताब्यात घेऊन ते पुढील सरकारी कारवाईसाठी सासवड तहसिल कार्यालयाकडे नेत असताना ही घटना घडली. याचवेळी ढंपरवरील अनोळखी चालक व नितीन वसंतराव निगडे (रा. गुळुंचे) यांनी अधिकाऱ्याला अडवून लाथाबुक्क्यांनी मारहाण, शिवीगाळ करत जीवे मारण्याची धमकी दिली आणि ताब्यातील डंपर जबरदस्तीने पळवून नेला. पळवून नेलेल्या वाहनाची किंमत अंदाजे सात लाख रुपये असून, डंपरमधील दोन ब्रास क्रशर मालाची किंमत सुमारे १२ हजार रुपये आहे.