बिबट्यासह दोन बछड्यांचे सुकलवाडी परिसरात दर्शन

वाल्हे, ता. ११ : सुकलवाडी (ता. पुरंदर) तालशेत परिसरात बुधवारी (ता. १०) रात्री शेतकऱ्यांना बिबट्या आणि त्याच्या दोन बछड्यांचे दर्शन झाले. त्यामुळे शेतकऱ्यांमध्ये भितीचे वातावरण पसरले आहे.
येथील संतोष पवार हे बुधवारी रात्री ११ वाजण्याच्या सुमारास तालशेत परिसरातील आपल्या जनावरांच्या गोठ्याकडे जात असताना सचिन आत्माराम पवार यांच्या उसाच्या शेताजवळ पोहोचताच अचानक उसात हालचाल झाल्याचा आवाज आला. क्षणात एक बिबट्या आणि त्याचे दोन बछडे उसातून बाहेर येताना दिसली. अचानक बिबट्या समोर दिसल्याने पवार यांचा भीतीने थरकाप उडाला. पण धीर न सोडता मोठ्या शिताफीने घर गाठले. यावेळी त्यांनी परिसरातील शेतकऱ्यांना माहिती दिली. त्यानंतर पवार यांनी शेजारील तन्मय पवार, गोविंद पवार आणि तेजस पवार यांच्यासह मोटारीतून पुन्हा त्या परिसरात जाऊन परिस्थितीची खात्री केली. त्यावेळीही त्यांना तोच बिबट्या आणि दोन बछडे दिसली.
या घटनेची माहिती मिळताच गुरुवारी (ता. ११) सकाळी वनविभागातील वनमजूर प्रेम दाते यांनी तालशेत परिसराची पाहणी केली. वनविभागाने शेतकऱ्यांना सतर्क राहण्याची सूचना केली आहे. वनविभागाने तातडीने या भागात पिंजरा लावण्याची मागणी सरपंच सरपंच व ग्रामस्थांनी केली आहे.