नीरा येथील बाजारात तुरळक गर्दी

वाल्हे, ता. १२ : नीरा (ता. पुरंदर) येथील बाजारात संक्रांतीकरिता खरेदीसाठी महिलांची तुरळक गर्दी होत आहे. तिळगूळ, हळदी-कुंकवाच्या वस्तू, वाणासाठी लागणारे साहित्य तसेच भाजीपाल्याच्या खरेदीसाठी महिला बाजारात येताना दिसत आहेत.
संक्रांतीसाठी बाजारात सुगड, विविध प्रकारचे वाण, तिळगूळ, बांगड्या विक्रीस आल्या आहेत. मात्र गेल्या वर्षीच्या तुलनेत यंदा खरेदीचा उत्साह कमी असल्याचे विक्रेत्यांनी सांगितले. दैनंदिन खर्चात झालेली वाढ तसेच आवश्यक तेवढीच खरेदी करण्याकडे ग्राहकांचा कल असल्यामुळे विक्रीवर परिणाम झाल्याचे व्यापाऱ्यांचे मत आहे. भाजीपाला व संक्रांतीच्या साहित्याला अपेक्षित प्रतिसाद मिळत नसल्याने अनेक विक्रेत्यांमध्ये नाराजी व्यक्त होत आहे.

परिसरातील विविध गावांमध्ये संक्रांतीसाठी बाजार भरत असल्याने येथील बाजारात यंदा गर्दी अपेक्षेप्रमाणे दिसत नाही. लोक खरेदीसाठी इतर बाजारांमध्ये वळले आहेत, त्यामुळे वाटाणा, पावटा, वांगी, गाजर, हरभरा, भुईमूग आदी भाज्यांच्या विक्रीवर परिणाम झाला आहे.
-भागाबाई लकडे, महिला विक्रेता

वाण, तिळगूळ आणि भाजीपाला आवश्यक तेवढाच घेतला जात असल्याने विक्रीवर परिणाम झाला आहे.
-अनिल दगडे, विक्रेता

मकरसंक्रांत साजरी करण्याची परंपरा आम्ही जपतो; पण महागाई लक्षात घेऊन यंदा आवश्यक तेवढीच खरेदी केली आहे. तिळगूळ व वाण घेतले असले तरी खर्चावर नियंत्रण ठेवण्याचा प्रयत्न करत आहोत.
-अश्विनी राऊत, ग्राहक