नीरेत भक्ती, श्रद्धा, परंपरेचा संगम

वाल्हे, ता. १४ : नीरा(ता.पुरंदर) येथील ग्रामदैवत श्री लक्ष्मीमाता मंदिरामध्ये मकर संक्रातीनिमित्ताने लक्ष्मी मातेला वाणवसा देण्यासाठी महिलांनी साजशृंगार करीत गर्दी केली होती. या निमित्ताने ग्रामदैवत श्री लक्ष्मीमाता मंदिरात भक्ती, श्रद्धा आणि परंपरेचा सुरेख संगम अनुभवायला मिळाला.
मकर संक्रांतीच्या दिवशी सकाळपासूनच मंदिर परिसरात सुवासिनींची गर्दी झाली होती. महिलांनी सुगडीच्या ताटात बोरे, पावटे, ऊस, हरभऱ्याचे घाटे, गव्हाच्या ओंब्या, ज्वारीची कणसे आदी साहित्य ठेवून ओवसा केला. त्यानंतर हळदी-कुंकू वाहून वाणवसा घेत लक्ष्मीमातेचे दर्शन घेण्यात आले. यावेळी सुवासिनींनी एकमेकींना हळदी-कुंकवाचे लेण देत व तिळगुळ देत ‘वसा घ्या वसा, सौभाग्याचा वसा, घ्यावा कसा मी सांगते तसा, लक्ष्मीमाता चरणी अर्पावा जसा’ अशा शुभेच्छा देत होत्या. मंदिर परिसरामध्ये मिळेल त्या ठिकाणी वसा पूजनाचे विड्याच्या पानावर साहित्य मांडत त्यावर हळदी-कुंकू वाहत लक्ष्मीमाता चरणी अखंड सौभाग्याचे लेण मनोभावे मागत होत्या.
फुगड्या, उखाण्यांनी आणली रंगत
मकर संक्रांतीनिमित्त महिलांनी मंदिराच्या प्रांगणात फुगड्या खेळून, उखाणे घेत आनंद लुटला. ‘तिळगूळ घ्या गोड गोड बोला’ असा स्नेहमय संदेश देत एकमेकांना तिळगुळाचे वाटप करीत पारंपारिक पद्धतीने मकर संक्राती उत्साहात साजरी करण्यात आली.

6198