बंद ‘अनुराज’ होणार लवकरच सुरळीत

यवत, ता. २९ : यवत (ता. दौंड) येथील अनुराज शुगर हा खासगी साखर कारखाना मागील काही वर्षांपासून बंद होता. तो दिवाळी पूर्वीच ओंकार शुगर समुहाने घेतला आहे. त्यामुळे लवकरच हा कारखाना सुरळीत सुरू होणार असल्याचे व्यवस्थापनाकडून सांगण्यात आले. यामुळे शेतकरी सभासद, भागधारकांच्या आशा पल्लवीत झाल्या आहेत.
अनुराज कारखाना बंद झाल्यामुळे कामगारांसह अनेक चिंतेत होते. मात्र, दिवाळीच्या काळात व्यवस्थापनाकडून सुमारे १७८ कामगारांना प्रत्येकी दहा किलो साखरेचे वाटप करण्यात आले. त्यामुळे हा कारखाना आता लवकरच सुरू होणार याची त्यांना खात्री वाटू लागली. ओंकार समूहाच्या इतर कारखान्यांप्रमाणेच हा कारखानाही निश्चितपणे सुरळीत चालणार आहे. त्याच बरोबर शेतकरी व कामगार यांना कोणत्याही समस्या येणार नसल्याचे या वेळी सांगण्यात आले.
कामगारांना साखर वाटपानिमित्ताने कारखान्याच्या नव्या व्यवस्थापनाकडून हा पहिलाच कार्यक्रम पार पडला. या वेळी ओंकार साखर कारखाना प्रा. लि.चे अध्यक्ष बाबूराव बोत्रे, संचालक ओमराजे बोत्रे, संचालिका रेखा बोत्रे, कार्यकारी संचालक राजेश थोरात, हरिभाऊ शेळके, राजेंद्र गाढवे, मुख्य शेतकी अधिकारी तानाजी टुले, बापू नाझीरकर, व्यवस्थापक रवींद्र नवले, मयूर दिवेकर व कामगार उपस्थित होते.

01514