भिडेवाडा ‘राष्ट्रीय स्मारक’ घोषित करावा; जिजाऊ ब्रिगेडची मागणी

पुणे, ता. ३ ः महात्मा जोतिराव फुले व क्रांतिज्योती सावित्रीबाई फुले यांनी १८४८ साली मुलींची पहिली शाळा सुरू केली व ज्ञानाची गंगा दारोदारी पोहोचवली. ज्या फुले दांपत्यांनी अनेक अडचणींचा सामना करत मुलींसाठी भिडेवाड्यामधून शिक्षणाची दारे खुली करून दिली, अशा ऐतिहासिक भिडेवाड्याची अवस्था आज खूपच दयनीय झाली आहे. त्यामुळे महाराष्ट्र शासनाने भिडेवाड्याची जमीन भूसंपादित करून राष्ट्रीय स्मारक म्हणून घोषित करावी, अशी मागणी जिजाऊ ब्रिगेडने पत्रकार परिषदेत केली.
यावेळी नीता होले फुले (वंशज), संघटनेच्या प्रदेशाध्यक्ष माधुरी भदाणे, प्रदेश प्रसिद्धी प्रमुख क्षिप्रा मानकर, प्रदेश कार्याध्यक्ष नंदा शिंदे, पुणे जिल्हाध्यक्ष सुनीता शिंदे, राजश्री शितोळे आदी उपस्थित होत्या. भदाणे म्हणाल्या, ‘‘स्त्री शिक्षणाचे शक्तिस्थान असलेल्या या वास्तूमुळे सर्व स्त्रियांना प्रेरणा मिळते. या ठिकाणची दुरवस्था होणे, हे अपमानजनक व खेदजनक बाब आहे. शासनाने मुलींची पहिली शाळा असलेली भिडेवाड्याची इमारत लवकरात लवकर सुशोभित करावी. तसेच महिलांच्या कल्याणकारी योजना राबविण्यासाठी प्रयत्न करत राज्यभरातून शिक्षणासाठी येणाऱ्या गरजू मुलींसाठी येथे वसतीगृह स्थापन करावे. अन्यथा संघटनेच्या वतीने राज्यभर जनआंदोलन करण्यात येईल.’’

क्रांतिज्योती सावित्रीबाई फुले यांच्‍या जयंतीनिमित्त जिजाऊ ब्रिगेडतर्फे राज्यभर या विषयावर जनजागृती करण्यात येत आहे. प्रत्येक जिल्हा, तालुक्यात महिला निदर्शने, धरणे आंदोलन तसेच शासनास निवेदन देणार असल्याचे मानकर यांनी यावेळी सांगितले.