उघडयावर वैद्यकीय कचरा टाकल्याने २५ हजार रुपयांचा दंड

पिंपरी, ता. २८ : महापालिकेच्या ‘क’ क्षेत्रीय कार्यालयाच्या आरोग्य विभागाच्या तपासणीत कुदळवाडी चिखली येथे उघड्यावर वैद्यकीय कचरा आढळून आल्याने २५ हजार रुपयांची दंडात्मक कारवाई लोटस हॉस्पिटलवर करण्यात आली.
सहाय्यक आयुक्त अण्णा बोदडे यांच्या पथकाने चिखली परिसरात स्वच्छता विषयक पाहणी करताना, रुग्णालयाचा कचरा रस्त्यावर पडलेला आढळून आला. त्यामधील केसपेपरवरून आरोग्य निरिक्षक वैभव कांचन गौडार व अमर सूर्यवंशी यांनी तपासणी केली. हॉस्पिटलचे डॉक्टर लाडे यांच्याबरोबर चर्चा करून वैद्यकीय कचरा योग्य पद्धतीने हाताळण्याबाबत सूचना दिल्या. वैद्यकीय व्यावसायिकांनी कचऱ्याची योग्य पद्धतीने विल्हेवाट लावावी, असे आवाहन महापालिकेकडून करण्यात आले आहे.