ॲड. गुणरत्न सदावर्ते यांच्यावर पुणे पोलिसांकडून कारवाईची शक्यता

पुणे, ता. १६ : राष्ट्रवादी काँग्रेसचे अध्यक्ष शरद पवार यांच्या निवासस्थानाबाहेरील आंदोलनप्रकरणी अटक करण्यात आलेले वकील गुणरत्न सदावर्ते यांना मुंबर्इ, सातारा पाठोपाठ आता पुणे पोलिसांकडून अटक होण्याची शक्यता आहे. आक्षेपार्ह विधान केल्याप्रकरणी ॲड. सदावर्ते यांच्याविरोधात भारती विद्यापीठ पोलिस ठाण्यात गुन्हा दाखल झाला होता. या गुन्ह्याबाबतचा अहवाल पुणे पोलिसांनी गृहविभागाकडे पाठविला आहे.
एक सप्टेंबर २०२० रोजी सदावर्ते यांच्या विरोधात भारती विद्यापीठ पोलिस ठाण्यात आक्षेपार्ह विधान केल्याप्रकरणी गुन्हा दाखल केला होता. याबाबत अमर रामचंद्र पवार (रा. कात्रज) यांनी फिर्याद दिली होती. पवार यांच्या निवासस्थानाबाहेर आंदोलनानंतर सदावर्ते यांना मुंबई पोलिसांनी अटक केली. त्यानंतर त्यांना न्यायालयीन कोठडी सुनावली. न्यायालयीन कोठडी सुरू असतानाच सातारा पोलिसांनी एका प्रकरणात सदावर्ते यांना अटक केली. सातारा न्यायालयाने त्यांना चार दिवस पोलिस कोठडीत ठेवण्याचे आदेश दिले. ॲड. सदावर्ते यांच्या विरोधात भारती विद्यापीठ पोलिस ठाण्यात गुन्हा दाखल आहे. शासनाकडून आदेश मिळाल्यानंतर पुढील कारवाई करण्यात येईल, असे भारती विद्यापीठ ठाण्याचे वरिष्ठ पोलिस निरीक्षक जगन्नाथ कळसकर यांनी सांगितले.