लाचप्रकरणी अभियंत्यांना अटक

पुणे, ता. ७ : मार्केटयार्डातील कामांचे बिल मंजुरीसाठी बांधकाम व्यावसायिकाकडे दोन लाखांची लाच मागितल्या प्रकरणी पुणे कृषी उत्पन्न बाजार समितीचे कार्यकारी अभियंता आणि उपअभियंत्याला अटक करण्यात आली आहे. न्यायालयाने त्यांनी शुक्रवारपर्यंत (ता. ८) पोलिस कोठडी सुनावण्यात आली आहे. कार्यकारी अभियंता प्रमोद कृष्णराव तुपे आणि उपअभियंता अरविंद दामोदर फडतरे यांच्या विरोधात भ्रष्टाचार प्रतिबंध अधिनियम कलमांन्वये ही कारवाई करण्यात आली. याबाबत २६ वर्षीय बांधकाम व्यावसायिकाने लाचलुचपत प्रतिबंधक विभागाकडे तक्रार दिली आहे. तक्रारदार यांना कृषी उत्पन्न बाजार समितीच्या स्वच्छतागृह व उद्योग भवन स्लॅबचे वॉटर प्रुफिंगचे काम केले होते. या दोन कामांचे बिल मंजूर करण्यासाठी बिलाची १५ टक्के रक्कम मागण्यात आली होती. त्यामुळे याबाबत तक्रारदार यांनी लाचलुचपत प्रतिबंधक विभागाकडे तक्रार केली होती.