‘नका वाजवू जोरात हॉर्न, आपली तब्येत राहील छान’

पुणे, ता. १२ : ‘नका वाजवू जोरात हॉर्न, आपली तब्येत राहील छान’, ‘हॉर्न नॉट ओके प्लीज’, ‘एक, दोन, तीन, चार, नो हॉर्न बार-बार’, ‘ऐका हो ऐका, हॉर्न वाजवू नका’ या फक्त घोषणा नाहीत तर, कर्णकर्कश हॉर्नपासून सुटका करून घेण्यासाठी टाकलेले एक ठोस पाऊल आहे.

लाइफ सेव्हिंग फाउंडेशन, पुणे पोलिसांची वाहतूक शाखा आणि नवचैतन्य हास्ययोग परिवारातर्फे ‘हॉर्न ठेवा एक दिवस बंद’ याबद्दल जनजागृती करण्यात आली. पुण्यातील १० चौकांमध्ये एकावेळी ‘नो हाँकींग डे’ उपक्रमाचे आयोजन केले होते. टिळक चौक येथे मुख्य जनजागृतीपर कार्यक्रम झाला. यावेळी पुणे पोलिस वाहतूक विभागाचे उपायुक्त राहुल श्रीरामे, विश्रामबाग पोलिस स्टेशन वाहतूक विभागाचे चंदनशीव, नवचैतन्य हास्ययोग परिवाराचे विठ्ठल काटे, एकपात्री कलाकार मकरंद टिल्लू, लाइफ सेव्हिंग फाउंडेशनचे देवेंद्र पाठक, साई पॅकेंजिंगचे शंतनू प्रभुणे आदी उपस्थित होते.
श्रीरामे म्हणाले, ‘‘पुण्यामध्ये वाहतूक नियोजन करणे हे अत्यंत आव्हानात्मक काम आहे. तब्बल चार हजार वाहनांच्या मागे एक कर्मचारी अशी सध्या संख्या आहे. पुणे शहरात ९८० कर्मचारी ४६ लाख वाहनांच्या वाहतुकीचे नियोजन करीत आहेत. लोकसंख्येपेक्षा जास्त वाहने असलेले पुणे हे एकमेव शहर आहे. एक वाहन दिवसातून ५ ते १० वेळा हॉर्न वाजविते. त्यामुळे दिवसभरात एक कोटीपेक्षा जास्त वेळा हॉर्न वाजविला जातो. ध्वनिप्रदूषणाची समस्या देखील महत्त्वाची असून त्यावर वेळेत उपाययोजना करायला हवी.’’
टिल्लू म्हणाले, ‘‘शहरात ‘नो हॉर्न’ ही संकल्पना प्रत्यक्षात उतरविणे गरजेचे आहे. वाहतुकीचे नियम पाळून आपल्या कृतीने इतरांची वृत्ती बदलण्याचा आपण प्रयत्न करूयात.’’