इंदारयणीतीरी आरतीचा नयनरम्य सोहळा

आळंदी, ता. १५ : दुथडी भरून वाहणारी इंद्रायणी...कडाक्याची थंडी... फुलांची सजावट...ब्रह्मवृदांचा मंत्रोच्चार आणि नागरिकांनी केलेला अखंड माउली नामाचा जयघोष...अशा भक्तिमय वातावरणात आळंदीतील इंद्रायणी तीरी आज प्रथमच आळंदी देवस्थानाकडून एकादशीच्या निमित्ताने इंद्रायणी मातेचे जलपूजन आणि आरती केली. हा नयनरम्य सोहळा पाहण्यासाठी इंद्रायणी घाटावर भाविकांनी गर्दी केली होती.
इंद्रायणीचे पावित्र्य अबाधित राहावे आणि घाटाची स्वच्छता कायम राहावी यासाठी आळंदी देवस्थानच्या पुढाकाराने इंद्रायणी नदीची आरती करण्यात आली. यावेळी आळंदी देवस्थानचे विश्‍वस्त अॅड. रोहिणी पवार, चैतन्य महाराज कबिर, अॅड. राजेंद्र उमाप, पुरुषोत्तम महाराज पाटील, आळंदी नगरपरिषदेचे मुख्याधिकारी माधव खांडेकर, ज्ञानेश्‍वर वीर उपस्थित होते.
सायंकाळी साडेपाचच्या दरम्यान माउलींच्या समाधी मंदिरात वारकऱ्यांची दिंडी काढून इंद्रायणीतीरी आणण्यात आली. आळंदी देवस्थानने इंद्रायणी घाटावर फुलांची सजावट केली होती. यावेळी ब्रह्मवृंदांनी मंत्रोच्चार केला, इंद्रायणीचे पूजन करण्यात आले, खणा नारळाने ओटी भरण्यात आली. त्यानंतर मुख्य आरती सोहळ्यास सुरुवात झाली. यावेळी संत ज्ञानेश्‍वर महाराज, संत तुकाराम महाराजांचीही आरती करण्यात आली. भाविकांनी माउली नामाचा गजर केला. पसायदानाने आरती सोहळ्याची सांगता झाली.