वडगाव आनंद येथील शाळेत आजीआजोबांसोबत एक दिवस

आळेफाटा, ता. २८ ः वडगाव आनंद (ता. जुन्नर) येथील जिल्हा परिषदेच्या प्राथमिक शाळेत आजी-आजोबा दिन उत्साहात साजरा करण्यात आला. यावेळी विद्यार्थ्यांनी आपापल्या आजीआजोबांचे पाद्य पूजन केले. त्यांना हळदकुंकू अर्पण करीत साष्टांग नमस्कार केला. यावेळी मोबाईल आणि टीव्हीच्या डिजिटल युगात विद्यार्थ्यांना घरातल्या नात्यांची नव्याने ओळख झाली.
राज्य शासनाने विद्यार्थ्यांच्या मनात आजीआजोबांविषयी प्रेम, आस्था निर्माण व्हावी यासाठी शाळांना हा उपक्रम राबविण्यास सांगितले आहे. त्या अनुषंगाने या कार्यक्रमाचे आयोजन करण्यात आले. आजीआजोबांसाठी संगीत खुर्चीचे आयोजन करण्यात आले होते. यावेळी त्यांनी शालेय जीवनातीलही आठवणींना उजाळा दिला. तसेच, यापुढे दर शनिवारी शाळेत येऊन नातवांना लेझीम, टिपर, जात्यावरची गाणी, पायफुगडी असे जुने खेळ व परंपरा शिकविण्याची इच्छा व्यक्त केली.
शाळेचे मुख्याध्यापक सुनील ठिकेकर, सहशिक्षिका शिक्षिका छाया डुंबरे, सुनंदा तांबे, गीतांजली बोराडे, सविता खेत्री यांनी कार्यक्रमाचे नियोजन केले. तर, शाळा व्यवस्थापन समितीचे अध्यक्ष दत्तात्रेय चौगुले, दत्तात्रेय वाळुंज यांनी या उपक्रमासाठी सहकार्य केले. माजी सनदी अधिकारी दत्ताराम वाळुंज यांनी सर्व विद्यार्थी व आजीआजोबा यांच्यासाठी आईस्क्रीमची व्यवस्था केली.