मंढरदेवी यात्रेचा मार्ग होणार सुकर

भोर, ता. १५ : मांढरदेव (ता. वाई, जि. सातारा) येथील काळूबाईच्या (मांढरदेवीच्या) जानेवारी महिन्यात होणाऱ्या यात्रेपूर्वी भोरकडून जाणाऱ्या रस्त्याच्या काँक्रीटीकरणाचे काम अंतिम टप्प्यात आले आहे. वन विभागाच्या हद्दीतील दोन ठिकाणचा सुमारे अडीच किलोमीटरचा रस्ता आणि भोर शहराजवळील ९०० मीटर रस्त्याचे काम वगळता इतर काँक्रीटीकरणाची सर्व कामे पूर्ण झाली आहेत. त्यामुळे भोरमार्गे मांढरदेवीला जाणाऱ्या भाविकांसाठी रस्त्याची अडचण येणार नसल्याचे सार्वजनिक बांधकाम विभागाकडून सांगण्यात आले.
यावर्षी मांढरेवीच्या यात्रेचा प्रवास सुखकर होणार आहे. आशियाई बँक योजनेअंतर्गत कापूरव्होळ-भोर-मांढरदेवी-वाई या मार्गाचे ४५ किलोमीटरचे काम पूर्ण झाले आहे. भोर शहराजवळील ९०० मीटर, भोर-ते मांढरदेवी मार्गावरील गोकवडी व अंबाडे हद्दीतील अडीच किलोमीटर आणि मांढरदेव ते वाई (बोपर्डी) पर्यंतच्या वुंडेवाडी (वाई) गावाजवळील सव्वा किलोमीटर अंतराचे काम वन विभागाच्या परवानगीमुळे बाकी राहिलेले आहे. भोर शहरापासून ते बुवासाहेबवाडी या ९०० मीटरच्या अंतराच्या काँक्रीटीकरणाचे काम युद्धपातळीवर सुरू आहे. पुढील १५ ते २० दिवसांमध्ये तेथील काँक्रीटीकरणाचे कामही पूर्ण होणार आहे. कापूरव्होळ-भोर मार्गावरील पूर्ण झालेल्या रस्त्यावर सुरक्षिततेसाठीच्या सर्व उपाययोजना पूर्ण करण्यात आल्या आहेत. यामध्ये क्रॅश ब्ररिअर, कॅटस आय, थर्मोप्लॅष्टीकचे पट्टे, दिशादर्शक व धोकादायक फलकांचा समावेश आहे. त्यामुळे या मार्गावरील रात्रीचा प्रवासही सुरक्षितपणे होत आहे.

भोर शहराजवळील रस्त्याच्या काँक्रीटीकरणाचे काम डिसेंबर महिनाअखेर पूर्ण होईल आणि भोर मांढरदेवी मार्गावरील वन विभागाच्या हद्दीतील पूर्वीच्या रस्त्याची तात्पुरती दुरुस्ती करण्यात येणार आहे. त्यामुळे मांढरदेवीला जाणाऱ्या भाविकांचा प्रवास सुरक्षित होणार आहे.
- योगेश मेटेकर, शाखा अभियंता, सार्वजनिक बांधकाम विभाग भोर

वन विभागाच्या हद्दीतील सद्य:स्थितीतला रस्ता हा साडेपाच मीटरचा आहे. परंतु भारतीय वनसंवर्धन अधिनियम कायद्यानुसार नवीन ७ मीटर रस्त्याच्या काँक्रीटीकरणाच्या कामाच्या मंजुरीसाठी शासनाकडे प्रस्ताव पाठविला आहे. त्याची मंजुरी आल्यानंतर सार्वजनिक बांधकाम विभागाला परवानगीही देण्यात येईल.
- शीतल राठोड, उपविभागीय वन अधिकारी, भोर