किसनवीर कारखान्याचा ऊसदर ३३५० प्रतिटन

‘किसन वीर’, ‘खंडाळा’तर्फे उसाला ३३५० रुपये

प्रमोद शिंदे; शेतकऱ्यांच्या सहकार्यातून गाळपाचे उद्दिष्ट साध्य करणार

भुईंज, ता. १५ : येथील किसन वीर सातारा सहकारी साखर कारखाना व खंडाळा येथील किसन वीर- खंडाळा सहकारी साखर उद्योगाकडे गळीत हंगाम २०२५-२६ मध्ये गाळपास येणाऱ्या उसास प्रतिमेट्रिक टन ३ हजार ३५० रुपये दर देण्याचा निर्णय कारखान्याच्या संचालक मंडळाच्या सभेत घेण्यात आला. याची माहिती कारखान्याचे उपाध्यक्ष प्रमोद शिंदे यांनी पत्रकाद्वारे दिली.
पत्रकात म्हटले, की राज्याचे मदत व पुनर्वसनमंत्री व कारखान्याचे अध्यक्ष मकरंद पाटील व खासदार नितीन पाटील यांच्या नेतृत्वाखाली संचालक मंडळाने अतिशय सूक्ष्म नियोजन केल्यामुळेच किसन वीर कारखाना प्रतिदिन ५२०० व खंडाळा कारखाना ३२०० मेट्रिक टनाने गळीत सुरू आहे. कारखान्याचे को-जन प्रकल्प, डिस्टिलरी प्रकल्पही सुरू आहे. किसन वीर व खंडाळा कारखान्याचे अचूक काटे हे शेतकऱ्यांमध्ये विश्वास वाढविण्याचे काम करीत आहे. मागील तीन हंगामामध्ये शेतकरी वर्ग, सप्लायर, तोडणी वाहतूकदारांची सर्व देय्यके दिल्यामुळे सर्वामध्ये कारखान्याप्रती विश्वास निर्माण झालेला आहे. याचाच परिपाक या गळीत हंगामात दिसून येत आहे. तो म्हणजे दोन्ही कारखाने सुरुवातीपासूनच पूर्ण क्षमतेने गाळप करीत आहेत.
किसन वीर व खंडाळा कारखाना कार्यक्षेत्रातील शेतकऱ्यांनी गळिताचे उद्दिष्ट पूर्ण करण्याकरिता व दोन्ही कारखान्यांनी पूर्वीप्रमाणे सुगीचे दिवस आणण्याकरिता आपला संपूर्ण ऊस कारखान्याला घालण्याचे आवाहन मंत्री पाटील, प्रमोद शिंदे, जितेंद्र रणवरे, व्ही. जी. पवार, राजेंद्र तांबे, उत्तमराव पाटील व कारखान्याच्या संचालक मंडळाने केलेले आहे.

-----------------------------