चाकण, महाळुंगे पोलिस ठाण्यांचे विभाजन

चाकण/कुरुळी, ता.१५ : राज्य शासनाच्या गृह विभागाने पिंपरी-चिंचवड आयुक्तालयाला चाकण पोलिस ठाणे तसेच महाळुंगे एमआयडीसी पोलिस ठाण्याचे विभाजन करून दोन नवीन पोलिस ठाणे निर्मितीचे आदेश दिले होते. त्यानुसार सोमवार (ता. १५) पासून उत्तर चाकण, दक्षिण चाकण, उत्तर महाळुंगे, दक्षिण महाळुंगे अशी नव्याने दोन पोलिस ठाणे निर्माण झालेली आहेत, अशी माहिती साहाय्यक पोलिस आयुक्त सचिन कदम यांनी दिली.
चाकण पोलिस ठाण्याच्या उत्तर चाकण या जुन्या पोलिस ठाण्यामध्ये जितेंद्र कदम हे पोलिस निरीक्षकपदी रुजू झालेले आहेत. तसेच दक्षिण चाकण ठाणे हे कडाचीवाडी येथे करण्यात आलेले आहे. या ठिकाणी निरीक्षक संजय सोळंके रुजू झालेले आहेत तर उत्तर महाळुंगे ठाण्याचा कारभार वरिष्ठ निरीक्षक दिगंबर सूर्यवंशी यांनी तर दक्षिण महाळुंगे ठाण्याचा कारभार वरिष्ठ पोलिस निरीक्षक विजय ढमाळ यांनी स्वीकारलेला आहे. दोन्ही पोलिस ठाणी नव्याने निर्माण झालेली आहेत. सध्या नव्याने निर्माण झालेल्या पोलिस ठाण्यामध्ये जुन्या पोलिस ठाण्याचे कर्मचारी, अधिकारी विभागून देण्यात आलेले आहेत. त्यामुळे कर्मचारी ,अधिकारी यांची संख्या ही पुढील काळात वाढणार आहे. चाकण आणि महाळुंगे या दोन पोलिस ठाण्यातून जी नवी दोन पोलिस ठाणे निर्मिती करण्यात आलेली आहेत ही ठाणी आयुक्त कार्यालयाने भौगोलिक रचनेनुसार व नागरिकांच्या सोयीनुसार निर्माण केलेली आहेत, असे संबंधित अधिकाऱ्यांचे म्हणणे आहे. त्यामुळे पुढील काळात नागरिकांना काय समस्या येतात हे पाहणे महत्त्वाचे आहे. दरम्यान, या पोलिस ठाण्यांमध्ये अधिकृत कोणती गावे आहेत याची यादी अधिकृत करण्यात आलेली नाही.

9900