भाजप कार्यकारी अध्यक्षपदाची सूत्रे नवीन यांनी स्वीकारली

सकाळ न्यूज नेटवर्क
नवी दिल्ली, ता.१५ ः बिहार सरकारमधील मंत्री नितीन नवीन यांनी भाजपच्या राष्ट्रीय कार्यकारी अध्यक्षपदाची सूत्रे सोमवारी हाती घेतली.
मावळते अध्यक्ष जे. पी. नड्डा, गृहमंत्री अमित शहा, व्यापार मंत्री पीयूष गोयल, शिक्षण मंत्री धर्मेंद्र प्रधान, माजी मंत्री रवीशंकर प्रसाद यांच्यासह पक्षाचे इतर नेते-कार्यकर्ते यावेळी मोठ्या संख्येने उपस्थित होते. बिहारमधील भाजपचे दिवंगत नेते नवीन किशोर प्रसाद यांचे पुत्र असलेल्या नितीन नवीन यांची नुकतीच कार्यकारी अध्यक्षपदी निवड करण्यात आली. बिहार मंत्रिमंडळात सार्वजनिक बांधकाम मंत्री असलेले नितीन यांचे आज सकाळी दिल्लीत आगमन झाले. मुख्यमंत्री रेखा गुप्ता यांनी विमानतळावर त्यांचे स्वागत केले. पक्षाच्या दीनदयाळ मार्गावरील भाजप मुख्यालयात आल्यानंतर त्यांनी पदाचा कार्यभार हाती घेतला. नितीन नवीन यांच्याबरोबर बिहार मंत्रिमंडळातील त्यांचे अनेक सहकारी दिल्लीत आले होते.