जग सनातन संस्कृतीकडे वळत आहे

जग सनातन संस्कृतीकडे वळत आहे

शंखनाद महोत्सवात सुधांशू त्रिवेदी यांचे प्रतिपादन

सकाळ न्यूज नेटवर्क
नवी दिल्ली, ता. १५ ः ‘‘सनातन संस्कृतीची खिल्ली उडवणारे लोक आता आयुर्वेदाकडे वळत आहेत. रासायनिक शेतीऐवजी सेंद्रिय शेतीचा तर चहा-कॉपीऐवजी ‘हर्बल टी’चा वापर वाढला आहे. एकेश्वरवादी लोक अनेक देवांवर विश्वास ठेवत आहेत. १७७ देशांनी योग दिनाच्या ठरावाला संयुक्त राष्ट्रांत अनुमोदन केले होते. मौजमजेत रममाण होणारे युरोपातले लोक कुंभमेळ्यामध्ये येत आहेत. हा सनातन संस्कृतीचाच प्रभाव आहे. सारे जग हळूहळू सनातन संस्कृतीकडे वळत आहे,’’ असे प्रतिपादन भाजपचे राष्ट्रीय प्रवक्ते खा. सुधांशू त्रिवेदी यांनी सोमवारी सनातन राष्ट्र शंखनाद महोत्सवात बोलताना केले.
‘‘भारतात एक अंतर्गत पाकिस्तान आहे. प्रत्यक्ष पाकिस्तानात आपण ‘ऑपरेशन सिंदूर’ राबवू शकतो पण देशांतर्गत पाकिस्तानचे काय करणार? असा सवाल भारतीय गुप्तचर संस्थेचे(रॉ) माजी अधिकारी आर. एस. एन. सिंह यांनी ‘रणसंवाद-भारताचे सामरिक धोरण’ या विषयावरील परिसंवादात बोलताना उपस्थित केला. तर ‘‘काश्मिरी हिंदूचा वंशविच्छेद झाला हे अजूनही सरकार मानायला तयार नाहीत. पर्यटनाने दहशतवाद थांबेल या भ्रमात कोणी राहू नये. जम्मू-काश्मीर मधील हिंदूंना देशातील सर्व हिंदूंच्या सहकार्याची आवश्यकता आहे,’’ असा दावा यूथ फॉर पनून काश्मीरचे अध्यक्ष राहुल कौल यांनी केला.