तिकीट दरांवर सरकारचे लक्ष ः नायडू

तिकीट दरांवर सरकारचे लक्ष ः नायडू
सकाळ न्यूज नेटवर्क
नवी दिल्ली, त. १५ ः ‘‘विमान प्रवासाचे तिकीट माफक असावे, यासाठी तिकिटांच्या कमाल दरावर मर्यादा घालण्यात आली असून, सर्व मार्गांवरील तिकीट दरांवर सरकारचे लक्ष आहे,’’ हवाई वाहतूक मंत्री के. राममोहन नायडू यांनी सोमवारी राज्यसभेत प्रश्नोत्तराच्या तासात सांगितले. इंडिगोच्या संकटामुळे अलीकडील काळात सरकारने तिकिटांच्या कमाल दरावर मर्यादा घातली होती. विशेष म्हणजे वर्षातील बारा महिने तिकीट कमाल दरावर मर्यादा घातली जाऊ शकत नाही, असे नायडू यांनी गत आठवड्यात संसदेत सांगितले होते.
तसेच, प्रवाशांच्या सेवेसाठी एअर सेवा पोर्टल सुरू करण्यात आल्याचे सांगत नायडू अन्य प्रश्नात म्हणाले की, उड्डाण लांबणे, विमान रद्द होणे, रिफंड, ओव्हरबुकिंग आणि प्रवाशांच्या सामानाविषयीची माहिती या पोर्टलच्या माध्यमातून देण्यास सांगण्यात आले आहे. पहिल्यांदा हवाई प्रवास करणाऱ्या लोकांना या पोर्टलची मोठी मदत होऊ शकते.