इचलकरंजीत शंभूतीर्थ स्थळाचे लोकार्पण

इचलकरंजी ः इचलकरंजीच्या पिण्याचा पाण्याचा प्रश्न सोडविल्याशिवाय ‘देवाभाऊ’ शांत बसणार नाही, असा विश्वास मुख्यमंत्री देवेंद्र फडणवीस यांनी येथे आज व्यक्त केला. छत्रपती संभाजी महाराजांचा इतिहास देदीप्यमान आहे. तो प्रत्येकापर्यंत पोचला पाहिजे. लोकवर्गणीतून इचलकरंजीत उभारण्यात आलेला त्यांचा पुतळा शासनाचा नसून जनतेचा आहे, असे गौरवोद्‌गारही त्यांनी यावेळी काढले.
येथील मलाबादे चौकात साकारण्यात आलेल्या ‘शंभूतीर्थ’चा लोकार्पण सोहळा हजारो जनसागराच्या साक्षीने झाला. यावेळी फडणवीस यांच्या हस्ते कळ दाबून धर्मवीर छत्रपती संभाजी महाराज यांच्या पुतळ्याचे अनावरण करण्यात आले. याप्रसंगी ते बोलत होते.
ते म्हणाले, ‘‘छत्रपती संभाजी महाराज यांच्या अतिशय भव्य आणि सुंदर अशा पुतळ्याचे अनावरण करण्याची संधी मला मिळाली. त्यामुळे आजचा दिवस माझ्यासाठी पुण्यवान आहे. स्मारक समितीचे मी अभिनंदन करतो. त्यांनी पुढाकार घेऊन मोठ्या प्रमाणात लोकसहभागातून छत्रपती संभाजी महाराजांचा पुतळा उभारला. चबुतऱ्याचे काम खासदार, आमदार यांच्याद्वारे शासनाच्या माध्यमातून झाले असले तरी आपल्या राजाचा पुतळा उभारणीमध्ये जनतेचा सहभाग असणे ही अत्यंत महत्त्वाची बाब आहे.’’
फडणवीस म्हणाले, ‘दुर्दैवाने देशामध्ये छत्रपती शिवरायांचा, छत्रपती संभाजी महाराजांचा इतिहास हा स्वातंत्र्यानंतरही दाबण्याचा प्रयत्न झाला. अगदी काल परवापर्यंत सीबीएससी अभ्यासक्रमामध्ये जो इतिहास शिकविला जायचा, त्यामध्ये मुघलांच्या इतिहासाला १७ पाने होती तर माझ्या राजाला केवळ एक परिच्छेद दिला होता; पण पंतप्रधान नरेंद्र मोदी यांनी याबाबतचा निर्णय बदलला. आता एका परिच्छेदामध्ये मुघलांचा इतिहास आला असून, छत्रपती शिवाजी महाराजांच्या इतिहासाला २१ पाने देण्यात आली आहेत. त्यामुळे स्वराज्याचा इतिहास आता मुलांना शिकायला मिळत आहे.’’