प्रवासवर्णन लेखन स्पर्धेत सदाकाळ प्रथम

ओतूर, ता. २९ : राज्य शैक्षणिक संशोधन व प्रशिक्षण परिषद, महाराष्ट्र, पुणे यांनी राज्यातील सर्व शिक्षक, अधिकारी यांचेसाठी विविध स्पर्धाचे आयोजन केले होते. रमणबाग पुणे येथे झालेल्या विभागीय स्पर्धेत अहिल्यानगर, सोलापूर व पुणे जिल्ह्यातील प्रत्येक तालुक्यामधून प्रथम क्रमांक मिळविलेल्या स्पर्धकांनी या स्पर्धेत सहभाग घेतला होता.
जुन्नर तालुक्यातील करंजाळे येथील जिल्हा परिषद प्राथमिक शाळेतील पदवीधर शिक्षक उत्तम निवृत्ती सदाकाळ यांनी ‘नीलगाईच्या शोधात...’ हा लेख लिहून ‘प्रवास वर्णन लेखन’ स्पर्धेत प्रथम क्रमांक मिळविला.
उत्तम सदाकाळ यांनी या यशामुळे करंजाळे गावाचे, जुन्नर तालुक्याचे व पुणे जिल्ह्याचे नाव उंचावल्याने त्यांचे विविध स्तरातून कौतुक होत आहे.
सदाकाळ यांनी, विभागीय स्पर्धेतील हे यश गटशिक्षणाधिकारी मा. अशोक लांडे, विस्ताराधिकारी विष्णू धोंडगे, केंद्रप्रमुख मधुकर आढारी, मुख्याध्यापक साहेबराव मांडवे, विषयतज्ज्ञ दीपाली थोरात, सीमा मोरे यांच्या मार्गदर्शनाने व प्रेरणेमुळे प्राप्त झाल्याचे आपले मत व्यक्त केले.
महाराष्ट्र शासनाचा राज्य आदर्श शिक्षक पुरस्कार, पुणे जिल्हा परिषदेचा गुणवंत शिक्षक पुरस्कार तसेच अनेक राज्यस्तरीय पुरस्कारांनी सन्मानित असणाऱ्या सदाकाळ यांची ‘पाऊस’ कविता इयत्ता दुसरीच्या अभ्यासक्रमात समाविष्ट असून त्यांचा ‘कमाई’ बालकथा संग्रह शैक्षणिक संशोधन व प्रशिक्षण परिषद, महाराष्ट्र, पुणे यांनी इयत्ता चौथी ते पाचवीच्या मुलांसाठी समग्र शिक्षा तर्फे प्रकाशित केलेला आहे.