पुण्यात सात जणांचा जागीच मृत्यू पुणे- बंगळूर महामार्गावर नवले पुलाजवळील अपघातात आठ वाहनांचा चुराडा

पुणे/धायरी, ता. १३ : पुणे- बंगळूर महामार्गावर नवले पुलाजवळ गुरुवारी सायंकाळी सहाच्या सुमारास झालेल्या भीषण अपघाताने संपूर्ण परिसर हादरला. ब्रेक निकामी झालेल्या भरधाव कंटेनरने आठ ते दहा वाहनांना धडक दिली. या भीषण अपघातात सात जणांचा जागीच मृत्यू झाला असून, दहा ते बारा जण गंभीर जखमी झाले आहेत. धडकेनंतर वाहनांना आग लागल्याने परिसरात एकच खळबळ उडाली.
प्रत्यक्षदर्शींच्या म्हणण्यानुसार, साताऱ्याकडून मुंबईकडे जाणारा कंटेनर नवीन कात्रज बोगद्याच्या तीव्र उतारावरून येत असताना अचानक नियंत्रणाबाहेर गेला. वेग अतिशय प्रचंड असल्याने कंटेनरने समोरच्या मोटारीला जोरदार धडक दिली. या धडकेनंतर मोटार समोरच्या ट्रकमध्ये अडकली आणि क्षणातच दोन्ही वाहनांना आग लागली. थोड्याच वेळात ज्वाळांनी रौद्ररूप धारण केले आणि मोटारीमधील चार प्रवाशांसह कंटेनरचा क्लीनर आणि इतर एकजण अशा सात जणांचा जागीच मृत्यू झाला. मृतांची ओळख पटविण्याचे काम सुरू आहे.
अपघातानंतर परिसरात प्रचंड वाहतूक कोंडी झाली. घटनास्थळी पुणे पोलिस, पीएमआरडीए व पुणे महापालिकेचे अग्निशामक दल दाखल झाले. जवानांनी आगीवर नियंत्रण मिळवण्यासाठी शर्थीचे प्रयत्न केले. दरम्यान, जखमींना तातडीने जवळच्या रुग्णालयात दाखल करण्यात आले असून, काहींची प्रकृती चिंताजनक असल्याची माहिती पोलिसांनी दिली आहे.
परिमंडळ तीनचे पोलिस उपायुक्त संभाजी कदम यांनी सांगितले, की प्राथमिक माहितीनुसार, या अपघातात सहा ते सात जणांचा मृत्यू झाला असून, काही जखमींची प्रकृती चिंताजनक आहे. घटनास्थळी बचाव कार्य आणि घटनास्थळाचा पंचनामा सुरू आहे. अपघाताचे नेमके कारण व जबाबदार कोण याचा तपास सुरू आहे.

महामार्गावरील वाहतूक ठप्प
या अपघातामुळे पुणे–बंगळूर महामार्गावरील साताऱ्याकडून मुंबईकडे जाणारी लेन पूर्णपणे ठप्प झाली. वाहतूक पोलिसांनी अपघातग्रस्त वाहने हटविण्याचे काम सुरू केले असून, परिस्थिती नियंत्रणात आणण्याचे प्रयत्न सुरू आहेत.

दृष्टिक्षेपात.....
- अपघातात सात जणांचा मृत्यू, चार जण जखमी
- कंटेनरचा ब्रेक फेल झाल्याने अपघात
- आठ वाहनांचा चुराडा, काहींना आग लागली
- पुणे–बंगळूर महामार्गावर वाहतूक ठप्प
- पोलिस, अग्निशामक दल आणि आपत्कालीन पथक घटनास्थळी.
-------